之前响BK收集左好多台北旅行資料,今次想回饋下, 寫番啲分享比大家。
剛上星期2大1小去了台北4日3夜慢遊,過了個輕鬆假期,
DAY1
坐中華10:15機, 點知DELAY左成個鐘,但都只係比原定遲左少少, 12:30到達。過關好快, 一出機場, 上左WIFI,同司機聯絡上(多謝BK 網友介紹司機)就上左車出發六福莊。車程30分鐘,NT1200, 抵啊。
我地BOOK 左綠地房, 之前一路睇都要成3000/晚,唔係好捨得, 但有一日突然見HOxxxS.COM有個優惠, 2700包早晚餐,就即刻BOOK, 因為上網睇館內食晚餐都唔平架, 而家包3個晚餐都抵番少少啦。綠地房係對住長頸鹿果邊既,一入到房, 嘩, 好大呀, 有2個沖涼間,個房窗外見到長頸鹿, 班馬, 犀牛咁! 所以一定要BOOK綠地房,因為我地後來經過藍天房果邊咩VIEW都冇, 但都要2000/晚!
我地首先參加左環尾狐猴互動體驗, 每人NT499。去到餵環尾狐猴食野,可能佢地好餓, 未入去已經虎視眈眈, 一開始即刻不停撲過黎,佢地會跳上你膊頭上, 仲有時跳3-4隻上來, 搞到我地好狼狽,件靚靚衫都比佢地係咁抓…不過小朋友餵得好開心, 因為佢未過摸呢啲動物,之前都只係响動植公園見過狐獴,狐猴, 對佢來說呢個係好特別既體驗。
餵完狐猴因為成件衫都污漕晒,所以要即刻返房沖涼。之後出去影下相, 仲去搵草泥馬, 草泥馬响藍天房果邊, 點知已經入晒籠, 無得睇...週圍睇左一陣, 拿餐券去食晚餐, 無諗過原來係自助餐, 真係好興奮! 因為好肚餓(機上食野後冇再食野啦)。食物普普通通啦, 但因為肚餓所以食左好多野!
仲有movenpick雪糕添!
夜晚館內全熄燈了, 動物要休息, 所以我地都返房休息了。
DAY 2
一早9:00左右起身, 原來啲動物已經起晒身,仲好活躍添, 長頸鹿仲比尋日多左一隻, 共有2隻,而且有一隻仲走近行人步道, 可以近距離接觸, 當然唔可以餵佢地啦。影完一輪相,便去食早餐。早餐同尋日同一間餐廳, 但食物有所不同, 都幾豐富架, 有中,西式, 清粥小菜, 生果, 等等。
之後我地報左名參加”草原歷險”(NT799/人)。草原歷險即係有架細VAN車我地入去猛獸區。入到猛獸區,發現原來佢同六福村係相通既,有些人玩六福村亦可以坐大巴入猛獸區或小火車在外圍觀看。所以如果唔想住六福莊既亦可以只玩六福村同睇動物。猛獸區內有獅子,老虎, 班馬, 好多犀牛(目測十幾隻),水牛, 黑熊等等, 而且好多都係自由放養,即係無欄架(犀牛除外) 。小朋友睇得好開心,因為呢啲動物都只係响電視上睇過, 咁近距離接觸都係第一次。
草原歷險全程一個鐘,都算抵玩, 佢另外有個獸籠車, 係可以餵獅子老虎既,但要10歲以上,而且要成NT1999/人,都幾貴,所以草原歷險算OK啦。玩完之後我地包左車出去台北,全程1小時, 約NT1600。
參考左之前網友既推介, 今次BOOK左西門町路徒行旅。3人房HK$9XX,台北市來講算平, 因為永安棧果啲要1600!
間房都幾細, 只係勉強放到2個喼。但厠所好大,仲有浴缸同花灑, 厠所同沖涼位置係分開既, 而且厠所無門鎖,怕尷尬既要考慮。B1有免費杯面, 小食, 聽講早餐有三文治(但無試過), 仲有好多遊戲玩, 例如射籃球機, 氣墊球,幾好玩, 小朋友有時返左酒店都要落去玩一陣。
夜晚去左西門町行一陣, 跟住求求其食左對面既鴨肉扁。1/4隻鵝要NT300,有些韌, 普普通通, 米粉NT60, 味道算唔錯。網上啲人話鴨肉扁招呼好差,試左又唔係呀, 似香港茶餐廳伙記咁, 唔係咁熱情, 無笑容囉,不過作為香港人,已習慣晒港式服務。食完野再行過去家樂福, 入面有間Decathlon,見啲野幾抵買, 尤其背囊最平只係NT299! 幾靚架。到比錢時發現原來係會員制,又要填FORM入會,算, 太麻煩了,放番低。講番, 呢間家樂福係24小時既, 入面人山人海,有好多手信區, 相信呢度都唔少遊客幫襯。我地買左啲茶葉呀, 撈面呀(有KIKI面,不過都要NT188,唔平得好多,費事抬返香港), 生果, 小食呀咁就返酒店啦。
(待續)
續...
Day 3
今日係DIY 日, 中午安排了郭益元整鳳梨酥,訂左一個親子套票同一個大人票, 總共2大1小,無記錯約$200。未接觸過整鳳梨酥既應該幾好玩, 難度就真係無乜,因為佢都調好晒材料, 基本上放入去搞下佢差不多就OK。2大1小票包NT$100購物代用, 每人一盒DIY鳳梨酥, 仲有份下午茶小食, 玩左2個鐘, 呢個項目都幾抵玩。
之後我地BOOK左去昆蟲館, 其實我都幾驚昆蟲, 但見佢網頁介紹既親子班或是導賞班都好似幾吸引同適合小朋友咁,而且價錢好平, $3x 一位, 於是我就幫我女報左。昆蟲館其實幾細, 但昆蟲種類好多, 同時館內仲有兔仔, 豹貓,科莫多龍, 盾龜等等。我地參加果個叫母親節特別班, 導賞姐姐會介紹昆蟲同動物媽點照顧BB, 小朋友仲可以摸甲蟲, 倉鼠,兔仔同豹貓。如果有小朋友對昆蟲有興趣真係可以黎參觀下 (無入場費), 而且佢好近木柵動物園, 可以順落去玩。
Day 4
返香港前食左一轉點水樓, 比香港鼎泰豐平同大碟, 我地點左好多野都唔駛$500, 又好味, 推介。
發表於 
返回列表
