今年係陳百強(Danny)60歲誕壽, 永遠懷
念Danny仔, 無人能夠取代他
今年係陳百強(Danny)60歲誕壽，環球唱片為Danny推出一系列紀念活動，包括推出紀念專輯及9月9號舉行《環球高歌陳百強》演唱會，邀請到盧冠廷、關淑怡、劉美君、林子祥、葉蒨文及譚詠麟等一班歌手演出。今日盧冠廷、關淑怡同劉美君就現身銅鑼灣出席記招。
活動由鄭丹瑞（阿旦）擔任司儀，阿旦首先多謝Danny，佢表示以前做編劇時，負責嘅電影成績麻麻，正感到心灰意冷、打算轉行揸的士前，寫嘅最後一套電影係《喝采》，當時由Danny同張國榮演出，拍攝期間Danny鼓勵佢要繼續寫劇本，先寫到今時今日。
出席嘅三位歌手除咗喺專輯嚟獻聲，亦會參與演唱會演出，其中盧冠廷話同Danny嘅合作記憶好深，仲記得Danny同佢講：「點解你唔紅？係因為你冇著到我啲衫咁靚。」盧盧話：「冇辦法，自己冇呢啲細胞，我都想好似佢咁靚，我依家學緊㗎喇。」
而劉美君就憶述初入行有機會同Danny合作，佢話：「未入行前已經好鍾意Danny，到入行後自己個形象要好Cool好有型，當見到Danny後佢竟然主動讚我，話我好型我聽到心花怒放。」關淑怡稱：「早喺讀書時期已經見到Danny喺學校門口拍嘢，自己仲係學生，但離遠見到Danny已經好鍾意佢。」
關淑怡又透露今次專輯內揀選咗最喜歡嘅《漣漪》，身邊嘅盧盧話呢首歌好難唱，關淑怡就話聽到咁講好有壓力，因為壓力在於已經錄完冇得再錄。講到嚟緊工作計劃，關淑怡透露已經重新回巢環球，目前正埋手製作新專輯，希望今年內會推出。
發表於 
返回列表
