今個暑假請左幾日假同左幾個親戚一齊去韓國玩，幾個大人同埋一個小朋友。
第一日搭完飛機去，其實都已經冇乜時間淨。
第二日大概十二點幾就出左弘大行街，個到有勁多細鋪頭仔，但其實間間都差唔多，不過係到買都幾抵嘅，好多都係一萬至萬五won，計番港紙好多一百蚊都唔洗就買到。
除左啲鋪頭仔之外，仲有好多大型連鎖店，好似ZARA H&M Forever21 Bershka 等等。
我諗大概行左兩三個鐘到就開始肚餓，結果就去左醫肚，食炒辣雞，之前都有做過下research，見呢間都好似幾出名下，我見都幾多遊客食，叫做申美京雙起司辣炒雞排，所以我地今次就試試佢啦！
一開始未食辣炒雞，個waiter幫我地整左個海鮮煎餅，正正常常咁啦。然後，我地叫左個四人份嘅辣炒雞，呢到出名雙色芝士嘅辣炒雞，但係我地驚太濟就冇嗌到了，各位sis到時都可以嗌黎試下，就咁嗌左個蔬菜辣炒雞。
味道黎講都ok嘅，我比個7/10分啦，可以一試嘅，除番開都唔貴。
行多陣街行到差唔多六點個陣，我地就去左Trickeye Museum，唔知有冇sis去過呢，我都係上網睇到，見啲人係個到影相好似幾得意咁，同行又有個小朋友，（但其實都唔小啦，都中一啦），諗住除左行街都有啲野比佢玩下咁。
同埋呢間野之前都有係香港開過，開左冇耐個排我都有同朋友去玩過下，影下相hea下都開心嘅，影埋啲視覺錯覺嘅相。
呢到就係佢個門口啦，佢仲有個Love Museum，係關於sex嘅，我地今次有小朋友就冇去到啦，有興趣又唔怕羞嘅sis可以考慮下同另一半去哈哈。
佢總共有四個館，我地買個張飛淨係包左兩個館，萬五won，差唔多一百蚊港紙到，其實都唔算貴。
係樓梯到已經有個oppa迎接我地
一落到去就見到啲好靚嘅風景圖，我都好想去。
入到個館入面就可以影到好多得意嘅相，話說down左個app，用個app影相個陣會有啲AR嘅effect，都幾過癮，之前去香港個個都冇，果然original個間係勁啲嘅。
比大家睇下有effect同冇嘅分別先
行完Trickeye就去左行Ice Museum，好凍，好凍，真係好凍，入面係零下唔知幾多度。佢有件類似披風嘅野比你嬲住，不過講真就冇咩用嘅，不過都叫做有好過冇嘅。我入去求其影左啲相就衝番出黎，老啦頂唔住啦，不過去感受下咁凍都好玩，始終係香港唔會咁凍。
最後影完相都差唔多八點幾，頹頹地食左個快飯，就番左酒店噜。
發表於 
返回列表
