少年成長今日: 0|主題: 16053

收藏本版

發帖

返回列表

跳至頁

查看: 5154 | 回覆: 2

閱讀興趣(2) [複製鏈接]

csir3290

子爵府

積分: 12230

1^#

發表於 18-9-2 12:22 |只看該作者 |倒序瀏覽 |打印

本帖最後由 csir3290 於 18-9-2 12:22 編輯

要培養一個小朋友閱讀興趣，除咗之前曾經提過要陪佢一齊睇書，一路讀一路指住啲字呢一啲技巧之外，今次我仲想講一啲我覺得好重要嘅方法。首先要令小朋友接觸唔同嘅書同埋多種類嘅書，因為小朋友需要不停有新鮮感同刺激，如果佢睇嚟睇去都只係嗰一兩本書，佢好容易就會悶。所以要令佢有機會接觸好多唔同種類嘅書，喺呢個時候其實香港圖書館係好幫到手嘅。自兩姊弟細開始我已經同阿仔阿女每兩個星期去一次圖書館，每一次都會同佢哋借盡16本書，而且一定係8本中文同8本英文。咁喺嗰兩個禮拜入面基本上每一晚我哋都可以睇到唔同嘅書同埋可以有唔同嘅故事去講，我就主要同佢哋睇中文故事而我老婆臨訓就會同佢哋講英文故事書嘅故仔。因為每兩個禮拜就已經有十六本新書擺喺屋企，所以佢哋經常就可以攞到唔同嘅書睇，而每一本對佢哋嚟講都係新鮮嘅書。當然小朋友細個嘅時候佢唔知㨂咩書好，咁就主要係我同老婆會幫佢哋揀呢十六本書。跟住到佢哋習慣咗一路大嘅時間，㨂書嘅主導權就會開始由佢哋自己決定，不過我同老婆每一次都會幫佢哋中英文最少揀兩本我哋認為啱佢哋程度可以自己睇既書等佢哋去睇，同埋亦都可以平衡番佢哋主要揀故事書同小說嘅種類。到而家兩姊弟雖然已經係咁大個，但係我哋都仍然係維持位呢個咁良好嘅習慣，就係每兩個星期去一次圖書館借書。
另外第二樣我覺得好重要嘅就係要同佢哋行書店，好多時出街除咗行玩具店之外，停留得最耐嘅就係書店因為書店入面有好多唔同種類嘅書畀小朋友去睇，當然唔係話去到書店就一定要買書啦！而係培養佢哋有一個行書店睇書嘅習慣。我對仔女都知道好多時我哋行書店都只係睇書未必一定次次會買書。當然行書店嘅時候唔係佢哋自己睇啦，我哋兩公婆都會陪住佢哋一齊睇，亦都順便留意佢哋鍾意睇啲乜嘢類型嘅書，從中發掘佢哋嘅興趣同埋話題。
另外我覺得要提嘅就係喺屋企啲書擺放嘅位置。我自問屋企乜嘢都執得好整齊，除咗書之外，小朋友嘅玩具通常會放返曬入櫃入面。我有個諗法就係啲書要放喺小朋友隨手可以攞到嘅地方，小朋友要見到書先，然後先見到玩具。只有咁樣當佢哋冇嘢做或者唔玩嘅時候，佢哋就會隨時隨地都可以係身邊攞到想睇嘅書。所以屋企嘅書可以話係四圍擺，甚至連喺電視機側邊都有個書架係擺曬啲書喺度。自細佢哋已經習慣未得到我哋嘅準許係唔可以開電視。我哋兩公婆唔喺屋企就更加一定唔會開電視。所以我哋擺唔同種類嘅書喺電視機側邊，用呢啲書呢吸引佢哋去睇代替電視。所以佢兩個從來唔會話冇電視睇而話悶，因為喺電視隔離就有好多唔同種類嘅書畀佢哋去睇。
最後要提嘅我覺得都係最重要嘅，就係要培養細路仔閱讀興趣其書實父母自己都應該要鍾意睇書。只有當小朋友見到自己嘅父母都鍾意睇書嘅時間，佢哋先至會覺得睇書係一件正常不過嘅事亦都係一個習慣。細個嘅時候我哋可能一齊陪佢哋睇，到而家兩姊弟都已經讀小學其實好多書都可以自己睇，我哋嘅習慣就變成每晚我哋都會熄咗部電視有大概一個鐘頭嘅時間大家都唔係好講嘢然之後各自拎住自己想睇既書就坐喺度睇。我好記得我個仔細個嘅時候曾經問過我，話爸爸點解你唔睇書，你只不過喺度睇雜誌同睇電腦。就係呢個問題令到我更加時刻要提醒自己。要幫小朋友培養一個習慣，係要自己做畀佢哋睇佢哋先至會知道呢個係一個習慣。只有當閱讀成為一個習慣，小朋友先至會愛上閱讀鍾意睇書。仲有一樣要提嘅就係我有個習慣，小朋友大咗好多時自己都會睇自己鍾意睇嘅書，但係間唔中我就會同佢哋講下叫佢哋講番畀我聽睇咗本書嘅內容究竟係講乜嘢，因為透過佢哋自己睇完本書然之後用番自己嘅說話講番個故事畀我哋聽嘅時候，佢哋對個故事會更加深刻同埋亦都學會自己嘅文字去表達番故事嘅內容其實都係一個閱讀技巧嘅訓練。不過當然我哋唔可以好似考試咁叫佢哋亦唔會每一本書睇完都講番個故事畀我哋聽喇。我哋要技巧啲我就會睇下佢睇咩書然之後同佢講本書好似好有興趣可唔可以將個故事講返畀我聽大概講乜嘢咁，佢哋通常都會好願意講畀我聽。如果好似考試咁提問佢哋如果當睇書變成一種負擔佢哋就唔會再睇㗎喇。
講到尾我要培養一個小朋友嘅習慣其實都係要睇父母點樣幫佢朔做呢個外在嘅環境，等佢可以慢慢養成一個習慣。就好似閱讀一樣，家長自己冇閱讀嘅習慣，就算家長用盡方法小朋友可能細個都會睇書但係當佢發覺家長原來自己都冇呢個習慣嘅時候，佢哋又點樣維持呢個習慣落去呢？因為我哋唔能夠一世坐佢側邊陪佢一齊讀一齊睇。