產前產後

跳至

首頁

尾頁
   34


別墅

積分: 534


發表於 19-2-27 22:52 |顯示全部帖子

34歲,第一胎,

12週時bb 頸皮3.9mmOscar超超超極高危,

想分享一下我嘅產前診斷經歷...



過山車一樣嘅個幾月,學到:

1.一定要定期做婦科檢查

2.Safe T21/ Nifty 係唔可以代替度頸皮,

正路係做一個NIPT(非入侵性測試)加度頸皮,一定要呀!





一直覺得可生可唔生,

無計日子無測排卵期,

如果你問我係計劃懷孕定意我外懷孕,

我會答:spontaneous



之後都係啲大路嘢,

察覺身體有啲轉變、發冷但無發燒感冒、

月經遲到,

仲記得1225日驗孕,

用咗兩款驗孕棒,勁快變色,

Christmas Day開咗個baby出嚟,

我地都覺得好驚喜!



上網左睇右睇,

先知道要去診所攞懷孕證明,

再去醫院、健康院登記,

醫院俾咗個Oscar期我,

其實都唔知乜嚟。



之後上網喪睇,研究Safe T21Nifty

咩教授版呀、nifty pro 呀,

睇完都唔係好知有咩分別,

一心諗住,做貴嗰個實無死。



1.一定要定期做婦科檢查



時間一轉,8週,14/1

第一次喺私家照超聲波,

石門高醫生,

見到傳說中嘅閃閃,

第一次聽到bb嘅心跳,

喺我剛好感動到想喊嗰陣,

醫生話:「你子宮有個瘤。」

醫生度個瘤嘅size,再話:

「好似實實地,初步估計係肌瘤,

你之前有沒有做婦科檢查?」

「無呀!」

(子宮肌瘤?聽都未聽過!)

「好常見,喺上面呢度,應該唔會逼住bb

而家唔需要擔心嘅,因為無嘢可以做,

保持觀察就得喇!」



行出醫生房,嚇到呆咗,

之後幾日就不停睇,

各類型、位置嘅子宮肌瘤啦,

BK揾同路人啦,

同時又再三同老公確認:

「醫生係唔係話粒瘤喺上面?」

「係唔係話唔會掂到bb?

3*5cm嘅瘤已經令我擔心咗好多日,

估唔到佢只係隻嘍羅......



2.Safe T21/ Nifty 係唔可以代替度頸皮,

正路係做一個NIPT加度頸皮,一定要呀!



12週,12/2Oscar

其實一早book16/2去高醫生度做SafeT21教授版,

我又以為Oscar係個低端版嘅T21

差啲想唔去。

但上次高醫生見我乜都唔知,

提我可以政府又去,私家又去,

咁就晨咁早去威院啦。



正常度高磅重之後,

一心以為係姑娘幫我照超聲波,

點知原來係一個着便服嘅女醫生。

佢好有信心,好快咁照,

邊照邊用英文同身邊嘅一位專科實習講:

Head bone...nose bone...spine... umbilical cord... brain...no TR... nuchal... you can see the fluid (向姑娘:幫我book 9)...the measurement... ratio less than one... this is good...

「你有無問題想問?」

「我有個子宮肌瘤」

「係喎,有兩個...(向姑娘)我俾三個measurement...3.x*5.x*xx...4.5*5.x*xx

「個位置有無問題?」

「喺上面,右手邊呢度,放心唔會整到bb

Bb 頸皮有啲厚,好,落牀先再講。」



醫生就同我解釋Oscar 嘅程序、局限,

佢話BB頸皮厚有好多原因,可能係基因問題,最常見係T21即係唐氐,

但係BB明顯見到鼻骨、CRL正常,

所以怕係其他基因問題令到佢頸皮厚。

除咗基因外亦都有機會係心臟問題,

即係照結構先見到嘅嘢。



我最記得問咗佢一句:「咁有幾厚呀?」

佢答我:「3.9mm。」

我嗰陣連3.9係一個咩概念都唔知,

佢就話正常範圍係2.5以內,3都已經超標。

我就話:「咁都幾厚下喎,有無人係呢個厚度但係生出來正常㗎?」

然後醫生就話:「6mm7mm10mm我都見過,不過通常嗰啲都有個水泡包住個bb,情況會比較嚴重。」



佢話我BB嘅情況係頸皮厚,

佢唔建議(佢前後講左三次唔建議)我做任何NIPT(無創測試)

我嚇到呆咗唔識反應,唔識問佢點解唔建議。

佢話我一定係高危,叫我等埋個Oscar嘅驗血報告,

醫院都會Offer抽絨毛或者抽羊水俾我,

詳細檢查bb基因,睇下有咩缺失。

佢亦再一次話唔建議嘥錢做NIPT

叫我而家開始諗究竟係抽絨毛定係羊水,

出面話抽絨毛係有1%機會流產,羊水就0.5%

不過喺佢地度做風險都好低,

因為佢哋好專業好熟手,

絨毛羊水都一樣,大概每1000個有1個有事,

叫我早啲有定心理準備,

而又同我講:「基因問題、心臟問題都唔關你個肌瘤事㗎,唔好擔心個肌瘤。」



而由於我係高危case

威院包埋個20-22週照結構期俾我,

即係醫生對姑娘講嘅「幫我book9吖」,

叫我可以慳返唔使喺出面照,

同時俾咗個報告我叫我交俾健康院,

後來我Google吓醫生個名,佢姓潘,

中大婦產科教授...



行出去之後呆咗,嚇到喊出嚟,

連度頸皮係做乜都唔知,而家又話頸皮厚又話抽絨毛,

上網㩒都唔知search 厚頸皮、SafeT21、有鼻骨定抽絨毛好。


別墅

積分: 534


發表於 19-2-27 22:53 |顯示全部帖子

3.原來Safe T21/ Nifty 只係一啲比較準確嘅screening,抽絨毛、羊水先係diagnosis



諗咗幾日,16/2見高醫生,太desperate,打算照驗Safe T21,驗完先算,點知...

照超聲波時,同醫生講:

「早幾日喺威院做Oscar,佢話我頸皮厚。」

「啊,(輕鬆)姑娘同你照㗎?」

「唔係呀,係中大教授嚟㗎」

Er(一臉應該唔會錯的神情)

高醫生度咗幾次,我見到3.9,3.94,4.14

「應該無錯,都係3.94呀咁啦!」

而高醫生都一樣,就算我book咗,佢都叫我唔好做Safe T21

佢直情直接問我:3.9,威爾斯有冇俾個絨毛期你呀?」

我話:「冇呀,不過佢話等埋驗血應該會出比我。」

高醫生話:3.9又有啲擲界,搞到你有得諗Safe T21。如果67呀嗰啲,上晝做完Oscar即日下晝抽埋絨毛喇!你唔使嘥錢做T21,因為厚頸皮有好多原因,做非入侵性嘅都係screening,比個比率你,知道高唔高危,safe T21測唐氏比較準,去到99.65%T13 T18都係99點幾%,但去到其他基因個準確度就好低,你呢個個案就算做完T21,最後都係要做真正嘅診斷,都係要抽絨毛或者抽羊水,做埋個晶片啦(DNA Chips)。絨毛羊水兩者,喺醫生角度係同樣操作方法,風險接近,只係14週前抽絨毛可以方便趁早打算。」



竟然,高醫生有錢都唔賺我,

居然,高醫生、潘教授嘅建議一模一樣,

咁我唔抽絨毛、羊水都唔得啦!



之後幾日好似等上刑場,一方面又知道自己係高危,同時間心底又希望自己高得嚟只係1:150/1:200嗰啲(雖然結果都係一樣要抽絨毛/羊水,但係心理上好過少少)



18/213週,臨收工4點幾收到威院電話,

我嘅Oscar報告出咗喇!

T21 (唐氏) 1:2

T18 (愛德華氏) positive

T13 (巴陶氏) positive



未收線已經忍唔住喊出嚟,

預咗高危啫,唔係高到咁掛?

即時喺電話book埋抽絨毛。

返屋企成程車,一直忍唔住喊,

三關高危,我點過?



當晚,我狂喺BK search,揾到好多1:41:71:51(咁都叫高危,咁我點算?),

最後有事/無事嘅例子,

但頸皮厚、1:2++,真係唔多覺有,

同時,雖然心知Oscar好多false positive

1:2喎,雙positive喎,真係會三關都false positive 咩?

我又揾埋T21T18T13缺失嘅soft indicators

回憶返幾次照超聲波,又唔似吖,

又有鼻骨,心臟無倒流,CRL剛好係average...唔通真係教授所講,係其他微缺失?



4.威爾斯產科真係一流



20/213週,收到電話之後兩日,威院抽絨毛

好驚,真係好驚,我從來都無穿無爛,

三十幾年嚟未入過醫院,血都唔流多滴,

怕痛,怕流產,咳緊,怕抽抽下咳,

老公份工無得請假,所以揾咗媽媽陪我。

等呀等,前幾手都喊住/眼濕濕出嚟,

終於到我。

現場有兩位醫生,一男一女,着中大袍,另外有三個護士,三個hku biochem學生。

女嗰位叫華醫生,聽佢講解咗好多嘢,我簽咗好多個名。



我一心想畀錢做DNA Chips($4900,7日),但醫生話有個新嘅叫FetalSeq$400010日,可以驗多1%嘅微缺失,我就迷迷糊糊話做呢個。



醫生又話,就算你加錢特快三日拎T23211813個快速報告,得9成幾準,你都要等10日嗰個fetalseq詳細報告先放心啦,咁不如唔好加錢,直接等10日嗰個,擔心少一次,而我又迷迷糊糊咁話好。



另外,風險方面,真係有份文件講有0.1%流產風險㗎,唔需要信台灣嘅3-5%同網上講嘅1%



男醫生姓梁,佢仲提我:「你記住一陣抽嗰陣忍住唔好咳呀。」



簽完上床,先照超聲波,D gel係暖㗎!

醫生邊自言自語,邊睇晒睇到嘅嘢,

我一直問問題,佢一直好温柔咁答。

總之,13週該見到嘅都有、都正常,

手手腳腳手指腳趾都無多無少,頸皮落返去3.5mm,都係厚。



中途我有問梁醫生(我個Oscar report係佢issue㗎):「1:2係唔係比較少見?」

佢微笑:「係高危啲囉,screening嚟嘅啫。」

「係唔係驗血結果好差?點解會高到咁?」

「你啲血無問題呀,合格呀,但你年紀加頸皮厚會拉高個比例,而唐氏high risk會拉高埋另外兩個risk。」



之後就照位落針,華醫生話唔係好夠位,

梁醫生拎咗個probe,推過啲:「呢度啦!(霸氣外露)

之後兩位討論要唔要做vaginal extraction,嚇到我眼都突埋。



睇完位,熄咗部分燈(好貼心,暖的gel,暗的燈,真係無咁驚),喺要消毒嗰陣,我!居!然!咳!好狠嗰隻。

華醫生苦笑:「咦?個位唔同咗。」

:「係喎contract 咗,要等佢relax返。」

向住我:「咳會令子宮收縮嘅,不過唔係危險嗰種宮縮,等佢鬆返就無事。」

然後,我地10個人一齊等我個子宮放鬆......



之後消毒、麻醉、落針,

梁醫生雙手輕輕按住我個肚,

華醫生負責抽,

過程中清楚感覺到佢拮入唔同嘅幾層,都幾痛下,

我忍唔住望下個screen,睇到佢撩下撩下,其實嗰刻真係太緊張,緊張到唔會咳!

我感覺到個肚皮濕濕地,仲問佢地係唔係血,姑娘話:「好少啫!」

之後聽到佢擠啲液體落個樽度,

梁醫生話:「完成喇!你做得好好呀!」



之後,其實連落牀都無力,

一用腰力就好痛,一咳就抽住痛。

但係威院啲醫生護士真係好好,

好温柔、好細心,令我好放心。



之後我睇返兩位醫生,

梁醫生係中大教授,中大婦產科嘅chairman,唔怪得咁霸氣,

而年輕嘅華醫生,係中大嘅honorary professor,威院associate consultant

計埋度頸皮嘅教授,三位都咁權威咁專業,其實我喺威院都真係有啲運。


別墅

積分: 534


發表於 19-2-27 22:54 |顯示全部帖子

5.There is always hope in hopeless.



抽完絨毛,10日先有報告,

感覺係,我都已經做晒做到嘅嘢。



就算bb 有事都只係基因問題,

係細胞分裂過程嘅error

只要唔係因爲「我」惹埋啲乜菌乜毒、食錯啲乜嘢垃圾食物呀嗰啲而影響個B

我心安理得。



但係,要過晒第211813對基因,

都真係要啲運氣。



以前會諗,

想生個女,要對眼似我,鼻似老公,

好似我咁好記性讀書咁叻專注力咁強etc..



bb 高危,

照超聲波連性別都唔想問,

真係覺得乜都無所謂,

健全、健康就得。



我同老公都覺得,如果bb基因有問題,

我地唔會咁偉大生佢出嚟。

老公覺得bb應該無事,而假如今次唔得就下次,

而我,一時覺得唔想再懷孕唔想再經歷一次同樣忐忑不安嘅心情,

一時又覺得好想好想要bb

等抽絨毛嗰兩日、抽完嗰兩日,

我喺街見到人哋大肚、拖住小朋友,

都忍唔住喊出嚟。



我有一個同事同我同期大肚,

我連佢個Nifty結果都唔敢問,

我怕我會妒忌佢有個健康嘅bb



其中一個唔想做三日快速報告嘅原因,

係我想安安靜靜咁過多幾日,

每星期一個bad news,我真係受唔住。



另一個原因係,如果bb真係唔ok

醫院應該好快會叫我去做人工流產,

但我都想拖多一兩週,喺我嘅人生至少感受一次胎動。



心底亦希望,假如報告話唔得,我都想揾個結構權威同我講bb結構正常,睇下有無機會係鑲嵌型胎盤呀、驗錯呀嗰啲。



但係,我都知機會好渺茫。



226

老公約我去食米線同飲珍珠奶茶(我嘅comfort food),

飯後行緊返屋企,老公拎起電話,35056000,咦?



我好驚,好驚。

又話10日嘅?

咁早打嚟係唔係有事?

老公握實我隻手,報緊我身分證號碼嗰陣,

我驚到震,驚到流眼淚。

老公緊皺眉頭:

「係,係,你講吖!」

「無問題?咁即係點呀?」

之後佢交電話俾我聽,

係上次抽絨毛嘅姑娘。

FetalSeq Trio報告呀,完全無事,比對過嘅基因一切正常呀。」

211813嗰幾對都無問題?」

「一切正常呀,呢幾對梗係無事啦,咁基本。你驗嘅係2019年嘅Trio,將23對基因放大好多倍喺顯微鏡下面逐條對,檢查咗百幾種微缺失,仲多過DNA Chips㗎。」



佢同我解釋返個情況,總之就係現行嘅科技下可以驗嘅都驗咗,而無驗到任何問題,下一關就係照結構。



雖然都仲有得擔心教授講嘅心臟問題,

但係,過三關,我成功咗!

T21 (唐氏) 1:2 clear!

T18 (愛德華氏) positive clear!

T13 (巴陶氏) positive clear!

基因缺失 all clear!



姑娘仲同我講,bb係女仔嚟㗎!



收線之後,我企喺街喊咗好耐,

開心到喊,感動到喊,

嚇死我喇,真係嚇死人喇。



There is always hope in hopeless.

1:2,positive, positive

高危到我searchsearch唔到嘅case

bb居然無事。



後記:20/2抽絨毛,遇到一位Safe T21唐氏1:8高危嘅媽媽,好後悔無同你交換contact,其實我每日都諗起你,你們好嗎?希望你同我一樣咁好運!


別墅

積分: 589


發表於 19-2-27 23:09 |顯示全部帖子
恭喜你呀媽媽,好善慕你!我也是唐氏高危媽媽,高齡加血唔及格,頸皮正常,但high risk 1:52. 我三月五號去瑪嘉烈抽羊水,由二月八號到今天,每晚扎醒好擔心。我冇揀Nigty or T21, 原因係我要知有唐氏/冇唐氏,唔係要知 High or low risk,雖然0.5%流產,但上網check抽水已經係最準。希望我都同你一樣幸運,baby健康冇病冇痛。

再次祝福你一家!


別墅

積分: 534


發表於 19-2-27 23:21 |顯示全部帖子
回覆 Wonda 的帖子

我當日簽咗份文件,係講話風險係0.1%,抽羊水比絨毛更安全,你一定無事㗎!

我1:2、+、+ 都過到,你bb唔會有事嘅,信心!!
知道你會好擔心,而家諗定自費做邊幾樣嘢啦,
醫生有無建議呀?

你記住要好好休息,做完請多兩日假,身、心都要抖㗎!


別墅

積分: 589


發表於 19-2-27 23:27 |顯示全部帖子
happyhang 發表於 19-2-27 23:21
回覆 Wonda 的帖子

我當日簽咗份文件,係講話風險係0.1%,抽羊水比絨毛更安全,你一定無事㗎!

其實今次第二胎,大女已經五歲。我發覺自己好唔update, 乜都唔知咁,我之前連nifty And T21 都唔知係咩。近期都盡量同自己講要冷靜啲,因為我而家日日頭痛,可能瞓得唔好又多嘢諗。希望自己放鬆啲,我唔想負面情緒去咗baby度。

我暫時打算三月五號做咗抽羊水先,我加$要快速result, 話兩日就知。

我希望個天賜呢個baby俾我,都可以俾baby一個健康身體。


別墅

積分: 710

2019新春慶豚圓


發表於 19-2-27 23:41 |顯示全部帖子
度頸皮得九成準. 度頸皮有假陰性亦有假陽性

T21/Nifty 係99%, 係因為有假陽性, 唔係假陰性

你醫生叫你抽羊水, 唔使做T21, 原因好簡單, 度頸皮已經顯示你係陽性, 係高危. 再去做T21, 好大機會亦係positve.
不如慳返幾千蚊, 去做一定準既抽羊水

但一般媽媽就唔同啦. 佢地度頸皮可以negative, 但negative可以係假陰性. 其實點都要做一次T21/Nifty


別墅

積分: 710

2019新春慶豚圓


發表於 19-2-27 23:45 |顯示全部帖子
度頸皮無用

我妹個姑仔, 兩胎係公立度頸皮都話無事.
點知第一胎就微缺失. 生左先至發現

過左幾年, 都高齡啦, 第二胎度頸皮又話無事.
兩公婆堅持抽羊水, 點知唐氏 (六合彩又唔見中), 呢次無要到BB


大宅

積分: 3374

2019新春慶豚圓 2019勳章


發表於 19-2-28 11:15 |顯示全部帖子
本帖最後由 fungenergy 於 19-2-28 11:19 編輯

睇到最尾好感動, 眼濕濕!! 恭喜晒你!!

我想講威院D醫生護士真係幾好
上星期去做Oscar, 我有個水瘤 (其實都驚係子宮肌瘤)
醫生即刻出左個照結構期俾我
其實我自己都book左私家照結構同Nifty pro
不過睇埋政府好似安心d, 始終政府醫生見過唔同case有經驗
所以都好認同你講政府私家都要去

我有同事淨係政府產檢
度頸皮o個d冇事
最後生出黎係唐氏....咁就一世



大宅

積分: 2226

2019新春慶豚圓 2019勳章


發表於 19-2-28 17:36 |顯示全部帖子
恭喜樓主呀, 睇到最後真係好想喊出嚟, 擁有一個健康bb真係要好感恩, 上天一定會比你最好架, 祝你一家平安同健康


子爵府

積分: 14259

BK Milk勳章 hashtag影視迷勳章


發表於 19-2-28 21:39 |顯示全部帖子
fasola 發表於 19-2-27 23:45
度頸皮無用

我妹個姑仔, 兩胎係公立度頸皮都話無事.

你妹個姑仔堅持驗羊水前,係因為驗過t21/nifty有事嗎?
Anyway the wind blows, doesn't really matter to me, to me...


男爵府

積分: 5994

2019新春慶豚圓 2019勳章


發表於 19-2-28 22:09 |顯示全部帖子
睇到bb冇事真係戥你高興,希望大家嘅bb都身體健康!


別墅

積分: 534


發表於 19-2-28 22:28 |顯示全部帖子
回覆 fasola 的帖子

所以真係要度頸皮(potential内臟問題)加Nifty/ Safe T21(染色體問題),如果真係接受唔到機率,
而想要一個確實嘅答案,
咁就要抽絨毛/羊水。

依家我都係到諗,
之後再懷孕嘅話,
可能我會毫不猶豫去抽絨毛/羊水,


實在怕左Oscar嘅false positive 同埋NIPT嘅false negative!


別墅

積分: 534


發表於 19-2-28 22:29 |顯示全部帖子
好多謝大家,希望我繼續good luck,
一切順利!


複式洋房

積分: 178


發表於 19-2-28 23:06 |顯示全部帖子
而家先睇到你個post,再次恭喜你!女女一定可以健康出世


男爵府

積分: 5280

2019新春慶豚圓 2019勳章


發表於 19-2-28 23:13 |顯示全部帖子
好彩,有驚無險,祝繼續好孕,生一個健康活潑的BB。
我自己BB剛11個月,我仲係越高齡孕媽媽,我當時只求生一個健康正常的BB,感恩上天綣顧,生了。現在只求BB繼續正常健康地生長,日日夜夜見到她可愛的笑容,已滿足


別墅

積分: 710

2019新春慶豚圓


發表於 19-2-28 23:23 |顯示全部帖子
orangekkkkk 發表於 19-2-28 21:39
你妹個姑仔堅持驗羊水前,係因為驗過t21/nifty有事嗎?
佢兩公婆未聽過t21/nifty

第二胎, 佢地驗羊水. 因為佢地只識抽羊水, 而且係公立睇呢
我妹之後先至打電話來求助. 我就話同醫生講法一樣, 羊水絕對準, 係就係有T21/nifty, 但, 再用T21 翻check 都無意思

佢地堅持抽羊水, 一來都高齡有35 歲左右, 二來第一胎出過事, 只可以話真係有直覺.


別墅

積分: 940

2019新春慶豚圓 2019勳章


發表於 19-3-1 00:40 |顯示全部帖子
happyhang 發表於 19-2-28 22:29
好多謝大家,希望我繼續good luck,
一切順利!

睇到眼濕濕,祝福你同bb女加油呀!


子爵府

積分: 11313

2019新春慶豚圓


發表於 19-3-1 04:13 |顯示全部帖子
Wonda 發表於 19-2-27 23:09
恭喜你呀媽媽,好善慕你!我也是唐氏高危媽媽,高齡加血唔及格,頸皮正常,但high risk 1:52. 我三月五號去 ...

唔駛擔心,其實抽過羊水就知唔係好高風險,個過程感覺好安全


複式洋房

積分: 190


發表於 19-3-1 12:11 |顯示全部帖子
happyhang 發表於 19-2-27 22:54
5.There is always hope in hopeless.

抽完絨毛,10日先有報告,感覺係,我都已經做晒做到嘅嘢。

恭喜你呀,睇到尾段BB無事,真的有少少眼濕濕,作為媽媽,只要BB健康就最重要了。祝你繼續好孕,生個健康BB女

首頁

尾頁

跳至
你需要登錄後才可以回帖 登入 | 註冊