少年成長

跳至

首頁
1

尾頁
   0


男爵府

積分: 6365

2019新春慶豚圓 2019勳章


發表於 19-5-12 11:36 |顯示全部帖子
前幾日工人姐姐放假所以三餐都要出外解決。又再一次見識到無敵電子奶嘴嘅效力。早餐嘅時候已經見到個爸爸喺隔離枱抱住個兩三歲嘅小朋友一路食一路睇電話,個爸爸同個細路一齊睇,個小朋友睇得好入神,個爸爸一路就餵佢食嘢,每一次個細路仔都會自動打開個口食曬啲嘢。個電子奶嘴發揮咗一個非常重要嘅作用就係 令到個小朋友好安靜咁一路睇住個手機一路食曬送到嘴後邊嘅食物。

到食晏嘅時候去咗另外一間餐廳,一對父母帶住一個小朋友,對父母好專心咁食緊佢哋碗拉麵,而個小朋友就自己坐咗喺架bb車度,bb又係大約兩三歲將個手機擺咗喺佢面前,今次個小朋友冇食嘢可能佢已經食飽咗,但係今次嘅電子奶嘴嘅作用就係令到個父母好安靜咁食咗餐飯,因為個小朋友全程到喺bb車入面一路睇住個手機,完全唔會騷擾父母。食完嘢之後亦都係各自自己睇手機全餐飯好寧靜地做渡過。

晚餐嘅時候隔離枱一家三口,我諗過仔都應該成十歲有多,全餐飯各有各食,三個人各自一部手機各自一碟飯。三個人三部機三碟飯,全程冇交流好似搭枱一樣。手機令到佢哋各自有自己嘅世界。

今次連我老婆都睇唔過眼,我老婆同我講有冇搞錯點解而家啲父母咁鍾意將部手機畀個細路。而家啲細路兩三歲你就開始畀部手機佢咁樣自己睇,要咁樣嚟送飯先肯食。而家啲父母就以為因為小朋友仲細個就可以控制到手機, 可以決定幾時畀佢睇幾時唔畀佢睇,諗下到小朋友大個啲嘅時候,佢已經習慣咗咁樣嘅模式生活,佢要攞你部手機嚟睇嘅時候你仲可唔可以控制到呢?到時呢啲父母又係喺度投訴自己嘅細路成日掛住睇手機甚至上網成癮手機成癮,講到好嚴重。其實始作俑者咪又係啲父母自己。難聽啲講其實啲細路玩手機就好似啲人吸毒一樣。但最惨係吸毒都可能係因為識咗啲壞朋友教壞佢哋,但手機成癮好多時係細路仔嘅父母做成。就好似啲毒品拆家咁 慢慢將啲毒品畀佢哋等佢哋上癮,到佢哋上咗癮嘅時候就擔心佢哋,就話佢哋點解會上癮。其實邊個最早餵呢毒品畀啲咁細嘅小朋友呢?

其實我自己講都講咗好多次,幾時啲父母先至肯放低自己部手機唔好再用部手機嚟毒啲細路仔呢?上癮容易戒癮難,吸毒成癮自甘墮落就冇得講啫!小朋友細個開始吸電子奶嘴其實係咪自己揀嘅呢?


男爵府

積分: 5324


發表於 19-5-12 14:12 |顯示全部帖子
因為父母本身都沈迷電子世界


複式洋房

積分: 121


發表於 19-5-12 15:16 |顯示全部帖子
csir3290 發表於 19-5-12 11:36
前幾日工人姐姐放假所以三餐都要出外解決。又再一次見識到無敵電子奶嘴嘅效力。早餐嘅時候已經見到個爸爸喺 ...

呢樣嘢我都好睇唔過眼,有次喺大家樂,見到一家四口,爸爸和媽媽的手機分別畀咗兩個小朋友,一直相安無事,直至媽咪要返工想揾返部電話,細女開始爆喊,佢眼光同雙手都係向住部電話,完全冇望阿媽,可悲 !


男爵府

積分: 6365

2019新春慶豚圓 2019勳章


發表於 19-5-12 18:57 |顯示全部帖子
回覆 angels'mom 的帖子

可惜嘅係啲父母完全唔覺得有問題


大宅

積分: 3830

2019勳章 MommyPanel勳章


發表於 19-5-14 14:40 |顯示全部帖子
管唔到人地,只可以理自己...
我老公都係機不離手(我無氣了),我都會睇但無興趣不停睇,阿仔睇書,間中同我講下書既內容笑下咁。
佢以前都係狂打機睇youtube的。
我想講父母唔肯改,仔女一定唔會自動改...
父母兩個都睇....仔女點可能唔睇?
父母唔理佢自己又顧住食同睇,有幾多個細路可以安靜坐定一粒鐘等你玩飽食完?換轉大人,一條友on 居居睇住兩條友食飯玩電話一粒鐘又得唔得?


男爵府

積分: 6365

2019新春慶豚圓 2019勳章


發表於 19-5-15 00:29 |顯示全部帖子
回覆 sinam 的帖子

同意,最後就變成溝通問題。


大宅

積分: 2652

2019新春慶豚圓 2019勳章


發表於 19-5-15 12:29 |顯示全部帖子
正所謂上樑不正下樑歪.


大宅

積分: 1095

2019新春慶豚圓


發表於 19-5-16 17:03 |顯示全部帖子
只可以身教


男爵府

積分: 7265

2019新春慶豚圓 2019勳章


發表於 19-5-25 00:40 |顯示全部帖子
比電子奶嘴嘅父母唔覺得有問題
佢地覺得時代進步咗,有慳水慳力嘅方法而唔用係笨,會話小朋友睇youtube學英文、玩apps學到好多嘢、要同同學有共同話題......
唔比小朋友咁早接觸電子產品係專制/老餅


首頁
1

尾頁

跳至
你需要登錄後才可以回帖 登入 | 註冊