Ben2003 發表於 19-9-24 11:53 
熱血時報 2014-11-23
佔中律師團咪再自稱義工 有誤會就唔好啦
十九號凌晨爆完玻璃之後，謎米新聞就出咗篇報道，話有被捕法律支援小組義務律師，拒絕受理立法會衝擊者，並批評衝擊者「你哋班人，咪抗拒組織，又想拆大台？有事就想打被捕支援熱線，世事有無咁便宜呀。」
本來一睇到呢單新聞，已經想開 post 鬧人，不過謎網篇報道又無source又無講係邊個律師講，驚鬧錯人會柒，好多謝林非 cap 圖，終於可以出師有名咁鬧。
革命初期（926-10月頭），尤其係926同928呢兩日，金鐘民眾之間嗰一種合作同互相關照，你唔親眼見過你係唔會想像得到。當差佬稍有動靜，成班人就衝晒過去擺好陣。口罩、遮、保鮮紙、水、紙巾，一剎那就由後排蜂擁而至咁送上前排。前排一中椒，隔離嗰個即刻帶佢去緊急救護站，其他人會開晒路畀佢行，跟住就有人補位繼續頂住啲差佬。去到救護站，即刻有醫生護士幫手洗眼洗傷口，好番啲又會問洗唔洗食餅飲水抖下，真係公立醫院都無咁好服務！
喺無咁多衝突，開始準備長期抗爭嘅日子，就開始有人派物資。食嘅：朱古力、包、餅、老麥；飲嘅：水、奶、寶礦力；防身嘅：口罩、眼罩、毛巾、退熱貼。你係意想唔到，亦都唔會去諗啲物資係邊個送嚟，因為大家都知道，呢啲就係好心人對佔領者嘅小小支持。
唔係話 take it for granted，但係就係呢啲一點一滴，支持住佔領者繼續頂落去，繼續衝上前為大家擋住差佬清場。
所謂一點一滴，當然包括義務法律支援。因為當時，的確係有人周圍派單張教佔領者，如果畀差佬拉咗要點做，大台亦都講過好多次嗰個被捕熱線係咩。小弟身為有份參與（跟風啫，又唔係帶頭）衝出夏慤道嘅佔領者，你大台又派得單張畀小弟，小弟係咪有合理理由相信，大台嘅義務法律支援，係會照顧埋小弟呢個衝擊者呢？定抑或，你當咗小弟係其中一個由你大台喺佔領區領導住嘅一隻羊仔？
十九號凌晨，一塊玻璃，就將烏托邦嘅面具撕破，將佔領區嘅現實表露無遺。原來有啲你以為人哋做好心、好偉大嘅善行，背後都係基於一種主從關係。
稱得上自己做支援組嘅義工，人哋被人拉咗，打去被捕支援熱線搵你去幫佢，都好合理啫。有邊個會諗到，原來被捕支援組，係 under 和平佔中秘書處；又有邊個會諗到，要你支援組去救佢，先要完全服從你和平抗爭嘅指令？
陳玉峰自己都話，律師應該放下個人觀感，為 client 最大利益去努力。咁就麻煩你唔好再稱自己做咩義工，或者你以後再派單張嗰陣，就印埋你和平佔中律師團份聲名落去，等人唔好誤會，廢時煩親你班大人瞓覺。
今次佔中律師團嘅澄清（小弟唔會話你割蓆，因為係衝擊者誤會咗你哋會幫佢啫），最大嘅影響，就係將本身守望相助嘅烏托邦，搖身一變成為各有各做嘅現實。日後，倘若有人計劃緊自發升級行動，要諗嘅第一件事就唔係被捕支援熱線係幾多號電話，有邊個可以幫到佢；而係「唉…畀人拉左，打到去會唔會又變咗飛行模式呢？算啦，都係唔好搞啦，繼續鳩坐鳩瞓等雙學升級啦。」又或者都係自己搵定有無識落啲義氣 fd 做律師，有難先可以救自己一命咁啦。
比起爆玻璃影響中間派點睇雨傘「運動」，一邊廂話大家都係同路人，一邊廂有事就劃清界線，呢一種民意內耗先至最影響運動走向，令運動無法走出膠著狀態。
尋找「閃光點」，努力不懈，堅毅不屈，機會總是留給有準備的人。但是，有準備不一定能找緊機會，因為....命運就是這樣的敲門。要找緊機會，就要戰勝自己和戰勝命運。
遇到逆境，堅持，不要放棄。黑暗是可怕的，極難耐的.....但是，渡過了黑暗，不就是黎明了嗎 ?!
發表於 
返回列表
