希望透過分享自己嘅經歷，向同路人或懷孕中嘅媽媽互相勉勵。
2019年3月底好高興地發現有咗，但係5星期做超聲波時發現有bb同時都有一個8*8嘅子宮肌瘤，醫生只係話現階段唔會處理個肌瘤，但肌瘤會影響bb吸引營養，又或會影響生產，我，即刻跌落地獄咁，淨係識喊，完全唔知點算好，但接下來發生嘅所有事更震驚，完全無緩衝期。
正因為咁論盡，見完醫生後都立即同公司講返個情況，就係當日，出去做嘢時見紅，即刻去醫院，等檢查照超聲波，bb又暫時無事，但就從此開始咗我因為流血進出7次醫院嘅序幕，由3月底到6月底，由粉紅色到紅色，由春天到夏天，每一次係急症室都好緊張，每一次去洗手間都好驚，試過係洗手間不停流，試過瞓瞓吓又流，試過出出吓學校流，由4月頭起，每天只敢卧床，只敢在食飯同去洗手間嘅時候落床，但有時一郁動也會流血，很感謝公司嘅體諒，很感謝爸爸媽媽每天照顧我嘅飲食，天天為我送餐，很感謝老公每分每秒嘅支持，終於7月初好轉，7月中重回中心工作。
當以為可以開心哋感受懷孕嘅樂趣，少年真的太年輕，8月初25週上班時感到肚實實，自己好像又有啲傷風便膽粗粗走去醫院，想想只取藥回家休息，誰不知在搏機時，發現我嘅宮縮好密好密，密到要生嘅頻率，我被送往產房，係產房，無啦啦產房，生仔個個產房，再繼續話我發燒不可用抗宮縮藥，意思即順其自然地生，但已沒時間給我想，因為我已開始痛得死去活來，搞不清楚是宮縮或是肌瘤痛，這時的肌瘤已受懷孕荷爾蒙影響大到14*14，這時只食咗退燒藥，留待那間冷冰冰的產房，全身淨係識震，聆聽著那些根本不能冷靜和舒服嘅音樂過了兩日一夜，有時醒有時睡有時痛，還有要使用便盆尿尿，簡直一輩子難忘，醫生見好像也穩定了送我回產前普通房，我內心也滿滿感動，老公在這兩天嚇壞咗，如走錯別的產房，又不敢在我面前哭，只敢背人流淚，爸爸媽媽也不能探我，全部一齊嚇壞。
當以為大步走過時，少年再次年輕，就在普通房的第一晚，我再次痛得死去活來，這次宮頸也短了，醫生也更明確地說我應該早產，甚麼自然產開刀的通通都說了，我當刻痛得只懂對住老公說：救我！救我！然後醫院婦產科十多個醫生一同前來幫我檢查，那個氣勢絕對不是給予信心，而係話俾我知：我好嚴重，老公嚇壞不敢回家睡，笑氣我都吸埋了，姑娘替我按摩減輕痛楚，我好想快啲瞓覺，因為經驗話我知瞓咗宮縮就會疏，就唔會早產，然後就這樣時而密時而疏又過了四日三夜，終於，終於，再次回普通病房，但從第一次走進產房起到生，我的宮縮一直無離開過我。
接下來，繼續住院，每日每夜望住所有媽媽待產，她們很期待的宮縮，我每分每秒都有，但往往我是該病房最不應有宮縮嘅產婦，如是者25週望26週，再望27週，終於到28週，好像安全一點點，又望29週，醫生也批准我回家繼續卧床。
回到家，情緒也超級唔穩定，每天也活在恐懼下，終於31週時再次回醫院，還記得那程的士雖短，但現在回想也眼框充淚，跟老公說：唔想再住醫院，好恐怖！對，就是烏鴉口，就這樣由31週住到36週幾開刀生bb，每星期搏三次機，每天爸爸媽媽送餐，老公從不缺席任何一個探訪時間，探到姑娘以為佢係待業人士，這段時間經歷bb生長不似預期，磅數完全不足，我又因個瘤同bb個頭頂住，每日硬著頭皮食晒所有飯餸，滴雞精，烚蛋，鮮奶，終於終於醫生話bb夠磅可以出來了。
這些經歷和過程真的好無助，幸運地我在人生擁有最豐盛時發生，有老公，爸爸媽媽，親人，朋友，同事嘅陪伴。
現在雖然仍未康復（仍然流血🙈），但希望可以愈來愈好啦，自我鼓勵一番。
發表於 
返回列表
