我識人試過,佢三個月做一次,不過每次係一個星期,次次都減到三幾磅,不過佢本身都唔算係肥,佢俾個D果汁餐單俾我,我老公想試,但我見到要買咁多嘢又要榨咁多汁放雪櫃,每日返工帶住去飲,想起都覺得煩,所以有試過。
識另一個就用中藥粉加煲湯飲斷食,呢個朋友跟一個大陸師傅去退修營,營入面就係斷食加冥想,一個星期後有見佢瘦到,不過好快又反彈。
第三個朋友係學佛後改食少肉加斷食,減咗成廿磅(本身係肥),後來行山跑步,keep住少肉到而家食素,一直保持體重冇點反彈。
再一個比較極端例子係我一個同事,本身好大件又鍾意食,因為壓力大而食嘢減壓,又冇運動,結果超重去到250磅(都有6呎高,但肚腩堅大),心臟負荷過重幾乎死,佢於是用168斷食法,加埋戒澱粉,半年內減咗三十幾磅,後來加埋做運動,再減多10磅,佢有教我呢個斷食法,我有跟過,四個月減咗5磅,不過我唔贊成完全戒澱粉,太極端。
花旗太太生活在花旗國,留意時差,你問我未必即時答到。