今次係第二胎，因為bb臍帶纏頸又怕佢太大隻我又陀得好辛苦，所以決定催生喇
前一晚9點入院，登記後姑娘內診，駁胎心機，姑娘話宮頸已經成熟唔駛塞藥，咁就返房休息
我住四人房，但當晚得我一個，間房好靚好新淨
全晚有啲不規律宮縮，唔知點解今次比第一胎緊張，好多嘢諗，成晚瞓得2個鐘
第二朝
一早老公拎早餐嚟好快咁食，因為約咗麻醉師八點。八點二入產房，八點九打無痛，打側身好似蝦米咁抱膝唔好郁，醫生手勢好，好快搞掂。點知打完又暈又想嘔，血壓又跌，嚇親老公
我瞓得差狀態真係唔好，就好似通完頂要去跑馬拉松咁。我心諗：死啦都未開始催生已經半死點算？醫生一路幫我慢慢較藥，好彩之後穩定到落嚟。
九點半左右醫生到，幫我落催生藥同人工穿水，嗰陣已經開兩度。落住無痛一路等開，陣痛都冇乜大痛～到十二點咁上下開4度，醫生話宮頸已經預備好但bb頭未落去喎，於是幫我插尿袋等膀胱唔好頂住，再幫我按摩宮頸加速產程。
差不多一點鐘，我覺得無痛藥唔係好平均，右邊小腹有好明顯痛感，姑娘用冰袋同我試，發現啲藥唔係好到，姑娘話再檢查再問麻醉師較藥。但呢個時候開始發現宮縮時bb心跳跌
擔心臍帶纏頸有影響。醫生想加催生藥再快啲比bb出世（如果唔係可能要開刀？
）醫生再幫我按摩宮頸，十分鐘由4變8度，執一執個位生得！
吓！我嗰吓好崩潰，我盼望緊幫我較藥㗎喎！好痛喎！忽然要生！點生呀
眼淚都滴出嚟
到拆埋床尾，要擺腳上架喇，唯有頂硬上，同自己講可以幫呀女嘅得我一個！醫生話生完就完全冇痛啦～
結果努力push咗5個 cycle到 5分鐘就出咗嚟！呢個小妹妹原來臍帶一圈纏頸一圈纏身
箍住個人所以個頭仔唔落嚟
好彩一出嚟都好夠中氣
都喊得大聲
見到呀女健康我都放下心頭大石喊埋一份🥲算你啦唔駛媽媽開刀
之後醫生幫我清埋下面，爸爸剪臍帶，影全家福。我之後再留喺產房瞓多兩個鐘，好攰好攰呀！
（產科醫生係 謝曉明醫生，兩胎都係由產前開始跟，溫柔又細心
手勢好好，今胎唔駛剪，冇傷口係爭好～遠～呀！
）
發表於 
返回列表
