大家好，我係新手媽媽，BB出左世三星期，想分享下之前不斷流啡流紅既經歷鼓勵下咁多位媽媽～文筆唔係咁好請見諒
唔想睇咁多字既媽媽：總結係流啡流紅唔一定係有咩事，我就係一直流啡（頭3個月- week37) 但搵唔到原因既例子
最緊要保持心境開朗，唔好急，記得有一日我追車之後即刻見紅見啡，各位媽媽記得真係要慢慢行。
由於我自己係第三個月先發現有左，頭果三個月我當然係乜都有食同有飲，有時見d媽媽問食左雪糕點算？食左魚生點算？其實食左就食左，都冇野可以做，放鬆心情就ok了。但點解第三個月先發現，最主要係因為我間中有流啡，甚至因為唔知情同老公做完運動之後流血（我仲以為係黎m）… 而家諗番，非常好彩地bb捱得到呢3個月。（呢三個月我喪食生野，去旅行，有飲酒，行山，中covid，照x-ray，touchwood bb出世暫時健健康康，有食奶有屎痾）
知道有左之後，14週開始我又見到自己流啡，即刻衝左去搵婦科醫生，不過佢照完超聲波之後勁chill咁話冇野既，可能有瘜肉，可能唔係，再觀察下啦。（冇咩宮頸短呀果d問題）最後我就番左屋企了。不過未feel到胎動之前係咁見啡都真係日日都擔心。
如是者間唔中我就會見到帶啡色既分泌物，喺大概20週左右某次醫院產檢既時候，醫生用鉗check 下面見到有瘜肉，即時meet走左，同時都開左d抗生素比我食，果次之後好左一排冇流啡既。
直到27週既時候有一日我瞓瞓下feel到下面有d水 bit 左出黎，唔知係咪穿羊水（turn out 應該係尿），同埋都再有見啡，有少少擔心既情況下拎住張生仔咭去左QE 3樓產房（好似係叫產房？），比姑娘醫生話我見啡幾日點解都唔早d入去
照舊都係照超聲波，宮頸果d冇問題，今次見唔到瘜肉，最後都搵唔到咩問題，瞓左兩晚醫院就出番去了。呢度要講講，佢地要唔見紅先比我出院，我當時直頭要祈禱佢check 我m巾果時唔好有啡
去到30-31週，個情況都係大同小異，有次私家醫生同我 check 話我又有瘜肉，叫我去醫院整走佢，不過最後果輪冇流啡我就冇整走佢。醫生見我keep住流啡，建議我放一個禮拜假，果個禮拜係好左少少既。同埋佢好緊張我，每次都提我私家醫院唔好咁早落訂驚早產，因為流啡都係早產既徵兆。
36-37週，開始直頭唔係啡係粉粉紅紅，都唔知係見紅想生定唔係，產檢果時醫生話未生得我先安心d。我本身約左38週開刀，由30週開始我每日都驚bb要早出黎，好好彩地，bb等到預訂果日都乖乖地喺肚裡面。bb 出世足磅，冇黃疸高果d，Size 正常，身體健康，而家日日扭食奶，我同先生都好感恩，畢竟bb都有d經歷.. 希望各位媽媽都順順利利生個健康寶寶!
發表於 
我估我既出血原因係因為郁到粒瘜肉流血，同埋我本身有子宮肌瘤唔知關唔關事。加油呀～～ bb要乖乖地痴實媽媽!
果時每日去廁所都希望唔好抹到血，轉眼間就出左世
做好自己本分，唔好亂食野，其他控制唔到既因素交比上天就ok。
返回列表
