少年成長今日: 0|主題: 15937

收藏本版

回覆發帖

返回列表

跳至頁

查看: 13624 | 回覆: 0

信任與自由 [複製鏈接]

csir3290

子爵府

積分: 11484

1^#

發表於 24-7-28 11:08 |只看該作者 |倒序瀏覽 |打印

有一日阿女突然間同我講話佢同學終於都開咗IG戶口，咁我話有乜咁奇怪話曬都已經中三，以而家嚟講，中三先至開ig，可能已經算係遲添。家姐同我講話原來佢個女同學屋企管得好嚴，話要考試考到頭五名先至可以開ig，另外，阿女仲話佢個女同學每個禮拜都要將部手機交畀家長檢查添！所以阿女覺得個同學好慘好冇自由。

自從阿仔阿女有咗自己手機之後，我同老婆一路都唔會干涉佢哋點用部手機，反而只係喺自己嘅層面用身教，教佢哋用手機嘅態度。我同老婆都覺得同青春期嘅仔女相處，信任鼓勵同埋自由係最緊要嘅！其中我覺得信任同埋自由更係重中之重，自己都做個細路仔，去到呢個年紀其實成日都會覺得父母對自己唔信任，呢樣唔畀嗰樣又唔鍾意，自己做細路仔嘅時候都會覺得點解唔畀自己去試下呢？我明白父母係擔心自己會做錯嘢，行多咗冤枉路，但係自己做細嘅時候，就硬係覺得父母應該畀自己嘗試就算錯咗都唔緊要，因為心甘命底，而且自己做細嘅時候，都會覺得如果父母信任自己，畀自己去嘗試反而會更加容易接受同埋考慮父母畀嘅意見。因為我覺得父母對自己信任就更加唔可以衰畀佢哋睇。相反當父母樣樣都幫自己決定，樣樣都顯示到唔信任自己嘅時候，其實就更加會閂埋隻耳仔唔再聽父母講，更加想爭取自己做決定嘅機會，亦都唔會諗住同父母商量，因為就算同佢哋傾都冇用，乜都係父母話曬事。久而久之大家就越嚟越冇嘢傾，關係亦會開始疏離。

另外一樣就係自由，當去到中學嘅時候，就會開始想爭取更多自由嘅空間，但係如果父母係呢個時間都仲係覺得自己嘅仔女同細路仔一樣，樣樣都管樣樣都干涉，連仔女同朋友講啲乜嘢都要知道都要管束嘅話，到頭來只會令到仔女覺得喺屋企係一種束縛，反而用盡方法要爭取更多自由嘅空間。我自己嘅經驗係盡量畀仔女自己做決定，喺可控嘅情況之下都盡量畀多啲自由空間佢哋。我反而遇到情況係，當你信任仔女畀佢哋做決定嘅時候，有陣時反而佢哋揸唔到主意仲會問返我哋意見，不過我嘅原則都只係畀意見，佢哋要自己做決定。我哋發現當我哋盡量喺可控嘅情況之下畀佢哋做決定同埋畀自由嘅空間佢哋時，其實反而仲增加咗大家溝通嘅機會，因為溝通係雙向嘅，當仔女發覺其實我哋會接受佢嘅意見，亦都畀佢哋決定嘅時候，反而佢哋會自動自覺問我哋意見同我哋傾，但係要記住要尊重佢哋嘅睇法同埋盡量畀機會佢哋作決定。

當然信任同埋自由係嚟至日常嘅觀察，我唔係叫家長突然間乜嘢都唔理就畀無限嘅空間同埋自由佢哋，咁只係叫做放縱。反而係家長更加需要嘅係透過日常觀察逐步去將空間開放畀佢哋，亦都要令仔女覺得父母係會因應佢哋嘅表現而逐步產生信任，而唔係乜嘢都唔理。而我同老婆除咗觀察仔女嘅表現之外，其實另外一個原因就係對我哋自己管教仔女嘅方法有信心，我哋覺得我哋由對仔女細個都大，一路教佢哋嘅就係培養緊佢哋獨立思考嘅能力，我哋一路觀察住佢哋嘅長大，所以對佢哋有信心之餘其實亦係對我哋自己教仔嘅方法有信心。