少年成長今日: 0|主題: 16106

收藏本版

發帖

返回列表

跳至頁

查看: 29452 | 回覆: 1

目標

csir3290

子爵府

積分: 12532

發表於 24-11-3 11:48 |顯示全部帖子

早幾日揸揸下車，正在同老婆講緊佢兩姊弟讀書嘅嘢嘅時候，老婆突然間同我講話有一日喺細佬本筆記簿度，見到佢自己寫低佢嘅目標係希望今年考第一，我老婆有啲擔心細佬會唔會畀過大壓力自己。因為平時其實佢兩姊弟都算係勤力讀書，我老婆仲話如果外人唔知道，仲以為我哋兩公婆畀咗好大壓力佢哋兩姊弟。但係講真，反而我哋係調返轉，其實冇乜畀壓力佢哋之餘，仲成日叫佢哋休息抖下，我仲成日叫細佬一齊打機添。因為我哋都知道其實佢兩姊弟都係自律勤力讀書嘅人，所以唔想額外再畀壓力佢哋，總之就算佢哋成績係點，我哋見到佢哋已經有努力，我哋都唔會有任何其他要求，就算考出嚟嘅成績麻麻地甚至乎有陣時唔合格，我哋都冇乜所謂。

但係我老婆見到細佬自己寫話自己想考第一，佢就擔心細佬會唔會有過大嘅壓力，因為細佬平時已經成日話唔夠時間做嘢，其實我哋都明白對仔女，自己咁有目標其實我哋應該開心，但係細佬間學校嘅壓力真係相對大，因為佢間學校程度都算高，所以我哋唔想細佬有咁大嘅壓力。總之我哋都覺得有溫習有盡過力考，出嚟嘅成績已經唔太重要。但係估唔到細佬原來自己嘅目標定得咁高，而且我哋都見到佢係真係有努力嘗試達到自己嘅目標。既然佢咁有推動力我哋又唔想好似挫敗佢咁，所以我老婆雖然知道細佬呢個目標但係都冇同佢講，只係好似平時一樣，反而仲多咗鼓勵佢去休息，同埋做自己鍾意做嘅嘢，亦都唔好將全部嘅注意力擺曬喺課本上面。

講真細路仔有自己嘅推動力係好，如果佢有自己嘅目標，仲識得盡力去達成自己嘅目標當然係最理想，但係做父母嘅又擔心佢壓力過大，仲要如果成日喺佢耳邊提住又好似太過囉嗦，所以我同老婆都係採取順其自然嘅方法，多啲正面鼓勵之餘亦都盡量搵方法去幫佢哋減下壓。我就同阿仔間中就會打下機，又會一齊睇下動畫睇下戲，亦都會同佢一齊發展佢嘅興趣，等佢嘅生活入面唔係淨係讀書咁單調。總之做父母就樣樣都要擔心，仔女無目標又驚佢做得唔好，有目標又驚佢壓力過大。但係講到尾阿仔自己咁有目標同推動力，我同老婆都係開心嘅。但係我哋都提醒自己千祈唔好為咗要佢達成呢個目標，再額外增加佢嘅壓力，總之凡事順其自然，而且幸好佢兩姊弟都遺傳咗我哋兩公婆比較樂觀嘅性格。只要佢自己做嘢有目標亦都盡力嘗試，作為父母嘅其實更加緊要嘅就係佢哋身邊支持，而唔係增加佢哋無謂嘅壓力。

私人傳訊