少年成長今日: 0|主題: 16049

收藏本版

回覆發帖

返回列表

跳至頁

查看: 1088 | 回覆: 0

唔好齋講 [複製鏈接]

csir3290

子爵府

積分: 12217

1^#

發表於 3 天前 |只看該作者 |倒序瀏覽 |打印

當仔女細個嘅時候，我哋好多時只要講畀佢哋聽點做，啲細路仔就會聽話，但係同樣嘅方法，當細路仔越嚟越大個嘅時候就會發覺越嚟越冇用，甚至乎講得多啲仔女會覺得我哋煩唔想再聽，我哋一開口，佢哋就即刻露出啲不耐煩嘅表情。佢哋覺得父母開口就係要佢哋做呢樣做嗰樣，或者係問長問短，總之就係煩厭唔想答。我哋成日聽人講身教緊要個言教，係好多人都講得出嘅道理，但係細路仔嘅時候，好多時只要話畀佢哋聽點做，佢哋就會跟住做，好多家長未必咁重視身教呢樣嘢，但係當細路仔越嚟越大個，佢哋見識越嚟越多，睇嘅嘢越嚟越多嘅時候，如果家長都仲係淨係得把口又難免令到啲細路仔覺得煩。所以我自己就覺得細路仔越係長大，我哋要教佢哋嘅時候就更家要著重身教。好多時有啲嘢唔使講，你做畀佢哋睇，潛移默化佢哋就會知道點做。我唔係話細個嘅細路仔唔需要身教，如果父母自細就開始身體力行咁當然係最好啦！咁樣細路仔就可以自細培養出良好嘅生活習慣。我只係話當我哋面對細路仔一路長大，其實齋講唔做，成效已經越嚟越低！

好似好多人成日都問點樣培養細路仔嘅閱讀興趣，其實不如先問點樣培養父母嘅閱讀興趣先，我哋成日叫細路仔睇多啲書，但係做父母嘅都只係機不離手，自己又唔睇書，唔好話書連雜誌都唔會揭下，但係把口就成日叫啲細路仔睇多啲書，咁又點會培養到佢哋嘅閱讀興趣呢！細路仔去到青春期最叻就係駁嘴，所以你叫佢睇書，其實佢心入面可能就係「你自己咪又係一樣乜書都唔睇！」所以要培養佢哋閱讀興趣，第一步就係父母自己都要睇下書，然之後先至講其他。想啲仔女有愛心，但係父母自己連喺街邊買支旗都冇，又或者父母自己都冇乜同理心，咁又點會訓練到有愛心又有同理心嘅細路仔呢！你想細路仔守時，緊張時間，但係父母同佢哋出街自己都唔守時，咁又點能夠令到細路仔覺得守時緊要呢！你想細路仔成為一個勤力嘅人，如果父母本身都係一個勤力嘅人，細路仔看在眼裏自自然然潛移默化，自己都會緊張自己嘅工作。你話佢飲完水連隻杯都唔識得擺好，父母自己係咪又係咁呢，或者你幫佢擺好，但係把口就一路話住佢哋，咁佢哋又點會服呢，我就相信你做得多，做畀佢哋睇佢哋自己就會知道點做。

總之青春期嘅細路仔其實好多時都唔再接受父母齋講，最簡單嘅講法就係你想細路仔將來成為一個點樣嘅人，做家長就先先自己要成為一個點樣嘅人先，身體力行點都好過齋講唔做！細路仔有返咁上下大，眼睛係雪亮嘅，做父母只要做好自己嘅榜樣，以身作則細路仔看在眼裏，根本唔需要你日日講到聲嘶力竭，喺佢哋心中都會慢慢建立出一套做人嘅規範。