少年成長今日: 1|主題: 16128

收藏本版

回覆發帖

返回列表

跳至頁

查看: 1031 | 回覆: 1

放開 [複製鏈接]

csir3290

子爵府

積分: 12766

1^#

發表於 3 天前 |只看該作者 |倒序瀏覽 |打印

呢個禮拜啱啱升中一放榜，派到心儀學校嘅當然係開心啦。派唔到嘅可能而家都仲喺度叩緊門，心情都仲係忐忑不安。放榜嗰日睇新聞，當然好多傳媒都去到唔同嘅學校採訪，總係影住派到心儀學校嗰啲小朋友興奮嘅心情，但係跟住就總係會將鏡頭集中喺派唔到心儀學校小朋友嗰種落幕心情，然之後去唔同嘅中學門口影家長頻撲叩門時候嘅情況。我理解派得唔好對細路仔同對家長嘅心情有幾大影響，因為自己嘅細路仔曾經都經歷過升中要參加大抽獎派位呢段時間嘅情況。但係唔開心還唔開心，我都好希望家長明白，當派唔到心儀學校嘅時候，如果家長都仲喺個仔女面前不停係咁數落佢唔鍾意嗰間學校嘅原因，四圍頻撲去搵學校嘅時候，心情亦都當然唔好，但係家長呢種心情對細路仔嘅影響可以大過派得唔好呢一個結果。

我自己就見過好多細路仔只不過視派位結果係一張紙，因為佢哋始終都知道自己會讀中學，一定有書讀。至於乜嘢叫做派得好，乜嘢叫做派得唔好，從來都只係成年人灌輸畀佢哋嘅諗法，有好多細路仔根本就從來都唔緊張，有陣時甚至乎連佢哋嘅家長都唔緊張。好多時乜嘢係好學校，都係家長由三四年班開始就不停同仔女講想佢哋去到邊一間學校升中，在於細路仔嚟講如果冇呢一種灌輸，咁對佢哋嚟講邊一間中學都係一樣，就好似佢哋升小一嘅時候，對細路仔嚟講間間學校都係同一樣嘅學校。所以我覺得好多時放唔開嘅都係家長嘅諗法。

試想像一下，如果家長不停都係講緊而家派到嘅學校有幾唔好，幾咁緊張一定要去叩到另外一間，當然叩到就梗係開心啦！但係如果萬一扣唔到，如果細路仔最終都係要去返原先派嗰間中學就讀嘅話，如果家長同細路都不停只不過係懷住對呢間學校嘅唔開心或者不滿意而入讀，到最後個細路仔又會唔會讀得開心，又或者就算個細路仔有能力喺呢間學校入面嘅表現又會唔會好呢！所以家長點樣去面對派唔到佢哋心儀嘅學校結果嘅心情就好影響細路仔之後點樣去面對！我自己就覺得唔好成日同啲細佬仔講嗰間學校有幾唔好，但我亦都唔係話叫啲家長要接受任何結果唔去叩門，我只不過係話其實個心情上應該一路都係灌輸畀個細路仔知道叩門只不過係希望更上一層樓，搵多一個機會，唔係話而家嘅唔好，只不過係希望可以搵得更好。如果唔得嘅話而家所派嘅都唔係話差或者唔理想。我哋要知道其實到最後萬一真係要入讀獲派嘅中學，咁就算你幾唔鍾意幾唔認同都好，但係始終要讀嘅都係你個細路仔，如果我哋而家不停咁講緊現在所派嘅又幾唔理想，有幾唔鍾意，所以先至要去叩門，萬一最壞結果出現嘅時候你又點樣回復心情去幫個細路仔去接受一個家長原本咁唔滿意嘅結果呢！叩門唔係最緊要，點樣幫細路仔去接受結果先至係家長最重要要處理嘅工作。

好老土咁講，如果家長覺得自己嘅仔女嘅能力係高，但係派出嚟嘅結果都係唔理想，而最終又可能要去返呢啲學校讀書嘅時候，話唔定以仔女嘅能力，可能係呢啲學校會讀得好好呢！家長認為呢啲學校可能普遍成績唔好，咁但係如果自己個仔女能力高，係呢啲學校又能夠讀得好，話唔定就能夠獲得更多嘅注意同埋更多嘅資源。所以老土啲都要講，家長嘅心情先至係對仔女將來升學最大嘅影響！如果家長都唔懂得放開，咁仔女又點可以放開心情好好地去讀書呢！換一個角度講，如果家長對學校唔滿意，又點樣可以做到家後合作，一齊培育自己嘅子女呢！