大仔大女媽媽會 今日: 0 | 主題: 177860

積分: 3664

畀面勳章

1^#

發表於 11-3-25 18:29 |只看該作者 |倒序瀏覽 |打印

唔好意思, 事發經過可能長咗少少, 敬請見諒!!!

三月七號(40w1d)

去最後一次產檢, 醫生約埋十五號入院十六號催生, 仲比咗張胎動紙我, 要 mark底千金由朝九晚九郁咗幾多次.

返到屋企, 肚仔已經有啲唔舒服, 都係一般 "宮縮"啫, 瞓醒晏覺先啦. 瞓到老公返嚟, 都係唔舒服, 不過又好似唔太嚴重.

我照常食飯, 睇電視, 上網, 沖涼瞓覺, 老公仲約我同 KARMAN第二日晏晝飲茶.

三月八號(40w2d)

瞓到點幾鐘, 痛多咗, 覺得開始有規律咁痛, 不過又可以忍到, 繼續瞓.

終於碌咗幾個鐘, 瞓下醒下到四點幾, 我開始 mark低幾耐痛一次, 又上網睇下陣痛係點......終於 mark到六點, 差不多隔五至七分鐘一次, 每次痛三十秒, 嗰種痛比經痛痛好多. 嗌醒咗老公, 咁我就去沖涼洗頭....其實我好驚又報假案!!

七點幾出門口, 落街無的士, 電召都無, 個肚越嚟越痛!! 响樓下周旋咗十分鐘先有車.

出到旺角, 點都忍住痛去明苑食埋個早餐, 我唔想無力生呀! 呢個時候陣痛由三至五分鐘一次, 都係痛三十秒. 食完早餐登記入院.

去到九樓產房, 開始做檢查, 咁好彩我遇著三個 "理大婦產科學生". 換言之, 我係白老鼠. 老實講, 我唔介意比佢哋做實習, 不過响我痛到想攞刀斬人嘅時候就難搞啲囉.

做完初步檢討入產房掛機, check BB心跳同宮縮, 掛咗個幾鐘係有宮縮, 不過未生得, 等醫生簽名轉上十一樓病房觀察. 一等到十二點幾開飯, 我就响產房食埋個飯, 醫生都未嚟, 咁我就出去搵老公, 終於搞到點幾鐘先上房.

成個下晝, 我就忍住陣痛, 由三至五分鐘一次, 又回落返五至七分鐘一次. 一襯唔痛我就行, 一係就同隔離床傾偈. 直至到夜晚探病時間, 老豆媽咪嚟探我, 老公攞飯比我食. 不過因為好痛, 所以開始無咩胃口, 但係我都格硬食, 唔想無力生.

三月九號(40w3d)

零晨時分, 越嚟越痛, 痛到忍唔著嗌咗出嚟! 我唔敢大聲, 驚嘈到隔離床, 最終忍到點幾鐘, 撳鐘嗌姑娘. 姑娘 check到我開到三度仲要見紅, 可以落番去產房.

落到產房, 都係例牌掛機, 掛咗個幾鐘, 無聲氣. 等(痛) 到天光, 醫生巡房, 醫生check 話我開咗一度半....吓!! 之前又話三度!! 天呀~ 我已經兩晚無覺好瞓兼無刷牙沖涼洗頭喇!!

呢日勁難過, 因為又有幾個媽咪生完, 走埋...我個繼續痛, 仲要一痛痛到上頂, 無止痛, 無氣比我聞...宮縮又回落番五至七分鐘一次, 不過下下都好似比刀插落條腰度, 度數一直都無再開.

黃昏時候醫生巡房, 我又好好彩比我遇著個 "婦產科顧問醫生"同一班學生, 呢個顧問醫生睇完我record 就話: "你入咗嚟兩日, 今晚仲未得就聽日同你催生啦!"

唉~ 我都想走!! 我响度兩日, 眼見同房已經有兩班生完, 可能人家已經出埋院. 我個肚又痛, 又無胃口, 又無覺好瞓......真係好灰囉!!

夜晚老公攞飯嚟比我食, 食完飯, 我去咗電視房坐波波, 我攰到洽眼瞓, 心情極差, 極頹喪!!

三月十號(40w4d)

零晨, 開始又痛密咗, 大概三分鐘左右一次, 仲要再痛深咗, 我忍唔住嗌咗出嚟, 跟住助產仕唔比我嗌, 因為原來嗌係會用錯力, 咁個子宮就收縮, 壓住個B, 影響到佢個心跳. 不過真係好難忍, 我用晒佢哋教嘅鼻吸口呼, 完全唔得囉. 助產仕再幫我 check, 好似開多咗少少, 但係仲未穿水, 宮頸未夠薄, 好灰.

我當時思緒好亂, 好想走, 唔知落咗催生藥最終都生唔到, 到頭來要開刀, 因為李詩夢同隔離床個媽媽都係咁, 好驚, 好痛, 好想即刻走!! 我就要求開刀, 助產仕話唔到事, 佢哋唔建議開刀, 仲要我自己問醫生.

直到朝早醫生一嚟我就已經要求開刀, 佢一口拒絕! 我要求出院, 咁當然係唔走得啦, 除非有私家醫院即時有位收我啦. 當時我已經情緒失控, 不停喪喊, 嗌開刀, 嗌出院, 要搵老公......由八點擾攘到九點幾, 結果係..少數服從多數. 跟著助產仕, 醫生準備幫我人手穿水, 我越嚟越驚, 覺得好似肉隨鉆板上囉.

穿咗水, 跟著吊鹽水同催生藥, 助產仕一早幫我攞定笑氣, 我襯藥力未到時要求無痛妢娩, 不過有機會唔得, 要到生嗰陣先由醫決定.

大概十分鐘後, 藥力發作, 嗰種痛...平時少少痛都食panadol嘅我, 痛到人都癲, 十級經痛!! 我有聽講過唔好聞咁多笑氣, 因為聞得多會嘔, 生嗰陣會無力. 不過嗰種痛, 令我不自覺咁吸, 雖然唔係完全止痛, 起碼我只係感覺到最痛嗰一刻.

西迷迷之際, 我好似聽到有人叫我唔好起勢咁聞, 又好似見到個鐘十一點幾......總之有人嗌我唔好聞, 我就停, 一聞到啲新鮮空氣, 我又好似醒醒地.

迷迷糊糊之下, 好似有人摸我個頭; 迷迷糊糊之下, 我好似打到啲嘢; 迷迷糊糊之下, 好似有人嗌我. 老公嚟咗!! 不過我聞氣聞到西迷迷, 根本比唔到反應, 我只係聽到老公叫我慢慢聞, 我又好聽話慢慢聞, 唔知幾時老公把聲唔見咗, 支笑氣又聞完, 我成個人完全清醒咗, 完完全全感受到陣痛指數27, 35, 60, 89, 103, 127....我痛到高聲呼叫, 助產仕即刻再幫搵笑氣, 不過因為嗰日連埋我有十個媽媽生BB, 根本唔夠樽用, 我唯有等. 我痛到不停抽搐不停典, 我諗大概痛咗兩個鐘, 笑氣又再返嚟我嘅身邊, 我又再進入西迷迷嘅狀態.

呢個時候, 除咗西迷迷, 痛之外, 仲想痾屎. 迷糊之際, 好似聽到助產仕話我啲胎水流晒落地下, 又好似有人幫我檢查, 仲有人問我打唔打只痛針, 我又好似有出聲話要痾屎.

擾攘間, 有人話要call 我老公, 但係我真係好急屎, 大概下晝五點鐘, 我就比人推咗入後產房.

我終於生得喇, 老公又嚟埋, 成個生產過程, 老公都陪著我, 佢仲睇住千金出世.

五點五十五分, 千金出世喇~!

後記

原來我痛到自殘囉!! 生完千金, 我條脷, 我個咀唇損晒; 右手瘀咗, 左手抓損咗囉.

0 0 0

私人傳訊

wmeunice

別墅

積分: 580

2^#

發表於 11-3-25 19:05 |只看該作者

多謝分享, 恭喜晒~

睇完你既經歷, 我都喊左出黎, 我而家都好驚, 因為醫生話我胎位高, 同埋個位唔好, 好難生, 我隨時會同你同一個經歷.....

私人傳訊

積分: 3664

畀面勳章

3^#

發表於 11-3-25 19:47 |只看該作者

唔好意思, 嚇親你~!
其實未生之前我係好肴底, 好驚痛, 生唔到, 可能要開刀.....我係新手媽媽, 一大堆令我擔心嘅問題响我生前一個月出現.
但係當生完, 助產仕抱BB 比你嗰一刻, 真係好感動!!
宜家諗番, 原來我係得架!!!
你都要加油~!!!

原帖由 wmeunice 於 11-3-25 19:05 發表
多謝分享, 恭喜晒~

睇完你既經歷, 我都喊左出黎, 我而家都好驚, 因為醫生話我胎位高, 同埋個位唔好, 好難生, 我隨時會同你同一個經歷.....

私人傳訊

wmeunice

別墅

積分: 580

4^#

發表於 11-3-25 22:24 |只看該作者

原帖由 Catherinebyorn 於 11-3-25 19:47 發表
唔好意思, 嚇親你~!
其實未生之前我係好肴底, 好驚痛, 生唔到, 可能要開刀.....我係新手媽媽, 一大堆令我擔心嘅問題响我生前一個月出現.
但係當生完, 助產仕抱BB 比你嗰一刻, 真係好感動!!
宜家諗番, 原來我係得架!! ...

而家我都同自己講, 唔好諗太多喇, 到時先算, 你都加油, 快D養好身體照顧BB, :)

私人傳訊

cloudwingwing

珍珠宮

積分: 47926

開心吸收勳章

5^#

發表於 11-3-25 22:45 |只看該作者

恭喜你, 終於挨過左
我算是忍得痛的人, 但有時都會好驚生仔
但有時又會唸, 其他媽媽都可以, 冇理由自己唔得

私人傳訊

積分: 3664

畀面勳章

6^#

發表於 11-3-26 02:01 |只看該作者

唔係嚇你哋, 真係好痛!!!!!
生佢嗰一個鐘都可以忍受, 但係之前個50個鐘真係好難忍, 不過都捱過咗, 原來我真係得架!!
廣華產房啲助產仕好nice, 聯針嗰陣又同我傾偈分散我注意力.
產後病房有護理, 又有堂上. 會有姑娘教餵奶, 換片, 沖涼...
如果大家打算順產, 我絕對支持响政府醫院. 起碼聞兩支笑氣 + 打止痛針唔會額外收錢(如果你係永久居民).
我住咗四日, 都係五百蚊有找.

私人傳訊

jamshum

積分: 259

7^#

發表於 11-3-26 02:55 |只看該作者

我年半前都係kwh生, 我覺得d助產士好好, 又住4人房, 同私家無分別, 我下胎都會去kwh生

私人傳訊

jamshum

積分: 259

8^#

發表於 11-3-26 02:57 |只看該作者

辛苦啦, 好好休息!congrat!!!!!

原帖由 Catherinebyorn 於 11-3-25 18:29 發表
唔好意思, 事發經過可能長咗少少, 敬請見諒!!!

三月七號(40w1d)

去最後一次產檢, 醫生約埋十五號入院十六號催生, 仲比咗張胎動紙我, 要 mark底千金由朝九晚九郁咗幾多次.

返到屋企, 肚仔已經有啲唔舒服, 都係 ...

私人傳訊

積分: 3664

畀面勳章

9^#

發表於 11-3-26 14:11 |只看該作者

我待產住11樓就四人房, 生完住9樓就大房.
不過都無所謂, 可以同其他媽媽吹下水都幾開心.

原帖由 jamshum 於 11-3-26 02:55 發表
我年半前都係kwh生, 我覺得d助產士好好, 又住4人房, 同私家無分別, 我下胎都會去kwh生

私人傳訊

wingwing_2020

積分: 420

10^#

發表於 11-3-26 14:18 |只看該作者

多謝你的經驗之談~
我而家都怕怕地~我預產期係31/3~

私人傳訊

積分: 3664

畀面勳章

11^#

發表於 11-3-26 15:00 |只看該作者

初初都好驚, 不過我宜家可以同大家講, 唔洗驚!!
的確係好痛, 不過當你見阿B, 幾痛都抵!!

原帖由 wingwing_2020 於 11-3-26 14:18 發表
多謝你的經驗之談~
我而家都怕怕地~我預產期係31/3~

私人傳訊

兔BABY

積分: 428

12^#

發表於 11-3-27 21:34 |只看該作者

多謝你的詳細分享啊~!!

我都係廣華生的,不過預產期係5月啊..過來3月區取下經驗先~!!

我想問一問呢...我地的老公係吾係要到生果陣時先可以入去陪產的.?之前一直都要自己去面對所有的過程啊?
另外..我又想問..BB出左世之后,老公係吾係都要等到探病時間先可以來探我同BB啊?

私人傳訊

shirleyying

子爵府

積分: 10743

13^#

發表於 11-3-27 22:39 |只看該作者

首先恭喜晒你!! 咁痛都生到女女出黎, 好叻啊!!

你女女係咪重磅B所以你陣痛過程要咁耐? 係唔係真係落左催生藥會快D?

私人傳訊

積分: 3664

畀面勳章

14^#

發表於 11-3-27 22:56 |只看該作者

產房探病時間你老公屋企人可以入嚟，探病時間晏晝一至二，夜晚六至八。
待產嘅時候，老公唔可以入嚟，差不多生得你會被堆入後產房，同埋會call你老公。
記得攞相機！
生完之後，如果唔係探病時間，老公settle好你啲用品就要走，同埋生完六個鐘唔可以落地，襯呢段時間你要好好休息，因為你可以落地嘅時候，阿B就全程交比你照顧直到出院。
希望可以幫到你，加油媽媽！

原帖由 兔BABY 於 11-3-27 21:34 發表
多謝你的詳細分享啊~!!

我都係廣華生的,不過預產期係5月啊..過來3月區取下經驗先~!!

我想問一問呢...我地的老公係吾係要到生果陣時先可以入去陪產的.?之前一直都要自己去面對所有的過程啊?
另外..我又想 ...

私人傳訊

兔BABY