意見反饋
義工

產前產後 今日: 46|主題: 240983

查看: 1338 | 回覆: 19
殘忍?


複式洋房

國民生產總值:441


發表於 11-4-8 20:34 |顯示全部帖子
現在大概有了4週左右.....但情緒十分低落....甚至經常哭
我係香港人,老公叫我去外國生,我人生路不熟,沒有任何親人,只得老公的姐姐在外國
老實講,我真的真的不想去,即使媽媽一人會陪我去...
老公的原因是因為希望BB 能得到外國護照,日後讀書會好D
晌佢既角度,我冇理由因為自己悶幾個月而咁自私....

因為哩件事我好唔開心,我唔知應該點...............
我一想起要自己孤伶伶去到外國,就自動流眼淚.....

點算好?


大宅

國民生產總值:2472


發表於 11-4-8 21:43 |顯示全部帖子
唔好唔開心啦!你唔開心...個BB會感受得到架。你有冇試過同老公講下你唔想係外國生的原因呀?此外, 我自己都會係外國生架。有時語言溝通唔到真係好難架。仲要自己一個人喎!如果你老公想你係外國生,佢又冇話陪你過去先?不如你試下好好地同老公傾下...睇下佢有咩反應先啦!


洋房

國民生產總值:62


發表於 11-4-8 21:45 |顯示全部帖子
邊度外國咁好O係O個度生就可以拎O個度既PASSPORT??


複式洋房

國民生產總值:307


發表於 11-4-8 21:53 |顯示全部帖子
而家先得個幾月你倆就已經攪到咁多唔係問題既問題,咁陀BB落去妳未有產後抑鬱就已經有產前抑鬱啦!!妳要將妳的感受及擔憂和丈夫商討,希望他可由妳的角度去仔細想想,希望大家可找出一個夫妻都能接受及可行的方式.妳丈夫想的安排是好的但他未想到妳的擔憂及所想......


珊瑚宮

國民生產總值:104655

2019勳章 開心吸收勳章


發表於 11-4-8 22:17 |顯示全部帖子
本帖最後由 bosch 於 11-4-8 22:18 編輯

好多地方既國籍係屬人主義, 即係bb 既國籍係跟父母既, 唔係跟出生地. 你check 清楚係咪有必要只係為本護照去外國生. 我個大仔響香港出世, 一樣拎到外國護照.

如果你地都會返去外國住, 咁駛乜而家煩小朋友讀書d 野? 到時佢拎特區護照, 申請到visa 或者id card 後, 一樣入到當地學校喎.

我覺得唔駛愁, 你想響香港生咪響香港生. 你響香港生之後, 唔代表bb 唔去得外國讀書. 有家人支持自己, 同醫護人員同聲同氣, 對大人同bb 都好緊要.


男爵府

國民生產總值:7745

畀面勳章 爸B勳章


發表於 11-4-8 23:15 |顯示全部帖子
iluvpug, 我同你啱啱調轉!我同老公離開咗香港,屋企人就想我返香港生,因為補身坐月會方便啲(我呢邊好少中國人!)但我同老公傾過,最終都係留喺呢邊生,因為如過要飛返香港生,起碼7個月就要返去,如果唔係就上唔到機。咁呢幾個月直至生嘅日子, BB嘅成長老公就會miss晒,加上如果早產嘅話,就連生嗰刻都miss埋㗎啦!我哋覺得生BB係兩夫婦嘅事,媽媽都要有爸爸嘅支持,加上媽媽嘅心情係會好影响到BB㗎,所以你同老公真係要好好傾吓,搵個最適合你哋兩個嘅選擇。


大宅

國民生產總值:3136


發表於 11-4-8 23:39 |顯示全部帖子
回覆 bosch 的帖子

拎特區護照唔係當地護照無咗當地福利,讀書會貴好多....


珊瑚宮

國民生產總值:104655

2019勳章 開心吸收勳章


發表於 11-4-9 08:49 |顯示全部帖子
29102011 發表於 11-4-8 23:39
回覆 bosch 的帖子

拎特區護照唔係當地護照無咗當地福利,讀書會貴好多....

同意.


但樓主一家人唔係長期係住當地, 如果冇交稅, 學費又唔知會點計...

我有朋友既case 係佢係響外國做野既日本籍單親媽媽, bb 響外國出世, 不過bb 出世時冇法定父親, 媽媽夠晒資格但冇入籍(即係拎住pr), 所以bb 冇外國國籍, 亦自然跟媽媽入日籍 , 學費同其他當地小朋友冇分別.

講到尾, 樓主同老公要check 清楚先. 讀書同埋福利呢d 野, 外國政府冇香港政府咁易話為.


男爵府

國民生產總值:5292

2019勳章


發表於 11-4-9 10:43 |顯示全部帖子
我知如果係美國生, 一出世可以拎美國passport...我外家都係係美國, 但我最後都係hk 生, 因為我唔想因為個passport 而同老公分開幾個月, 尤其你大肚, 老公0既支持係好重要ga...我地都考慮左成個月, 之後先決定gei...你同你老公再傾下la...講真, 如果外國得你老公個家姐, 佢會唔會take care 你先, 唔好因為個passport 而寄人離下loh...


複式洋房

國民生產總值:441


發表於 11-4-10 00:54 |顯示全部帖子
多謝各位既支持呀

我同老公兩個都係特區護照,老公想我去加拿大生,係因為一出世就有果邊PASSPORT...咁佢第時讀書會好D囉?

但我地頂籠只係諗住退休後先會去加拿大住....之前既日子就絕對唔會晌果邊長住囉....

所以我都好無奈,哩兩日都好DEPRESSED...一想起就會失控地哭....:


複式洋房

國民生產總值:441


發表於 11-4-10 00:55 |顯示全部帖子
老實講,就算老公陪我,但因為起碼我都要去果邊住三四個月,佢最多只係黎到一個月...其餘既日子....:(


珊瑚宮

國民生產總值:104655

2019勳章 開心吸收勳章


發表於 11-4-10 05:46 |顯示全部帖子
你地唔退休都唔去加拿大住, 咁即係要bb 將來自己一個人去果邊留學? 到你地想全家移民時, 仔大女大佢地都未必肯聽你地支笛一齊去移民.... 你老公想而家當買定個保險都無可厚非, 但十年後法例會變成點又冇人知... 我諗你地要諗清楚值唔值得咁做先.

女人陀b 湊b 冇人陪, 唔駛諗到天跌落黎. 我第一胎就係咁, 到我生第二胎見到老公個反應至知內疚, 之後就算想返香港生都冇返啦, 因為有d野真係miss 左就一世架. 我既過來人經驗只可以話生仔d野一個人去做晒唔代表d 乜, 女人一個人去生仔, 點都有bb 去陪住自己同支持自己, 但男人就唔同, 男人唔去參與就一世都補唔番, 呢樣你老公真係要自己去想清楚... 但始終都係兩個人一齊去經歷和參與會好好多. 總之如果你想有老公陪, 你一定要同佢講, 唔好自己屈住屈住咁喊.


伯爵府

國民生產總值:17826


發表於 11-4-10 07:42 |顯示全部帖子
iluvpug 發表於 11-4-10 00:54
多謝各位既支持呀

我同老公兩個都係特區護照,老公想我去加拿大生,係因為一出世就有果邊PASSPORT...咁佢第 ...

我老公係加拿大藉, 所以即使喺香港生都係加拿大藉, 但我冇諗到要佢去加拿大. 坩白講, 我老公成家人移民後讀完書後全部返哂來香港做嘢, 因為喺嗰邊係....搵唔到食嘅!

以前就話要移民驚中國唔知點, 但十幾二十年後, 西方世界一定唔夠東方競爭wor. 我反而想個小朋友返北京/上海讀書, 學好普通話可能仲好發展!

同埋你要預喺加拿大生仔你唔係當地人冇保險係超貴, 再加起碼兩個月食宿費(超過7個月唔俾你入境), 好甘ga, 要計清楚條數!


伯爵府

國民生產總值:17826


發表於 11-4-10 07:49 |顯示全部帖子
仲有係check清楚每個省嘅政策, 我知BC省(Vancouver) 即使你過去要住滿十年先可有老人金攞, 所以如果你退休先過去, 頭十年你要食自己嘅. 你check清楚啲好, 退休過去住未必係你想像中咁好.


複式洋房

國民生產總值:441


發表於 11-4-10 13:50 |顯示全部帖子
其實佢主要係想小朋友讀書好d..我地兩個其實就唔需要有戶藉

其實我最想既就係開開心心,簡簡單單咁晌香港生,同一般香港人冇分別..
其實我唔覺得哩個要求好高,不過老公就純粹渣住一個point,如果我唔去果邊生,第時小朋友搵讀書有壓力,甚至乎佢講到小朋友會嬲我

老實講,我同老公真係冇協議,因為佢有佢覺得讀書好,我唔去係我短視,我咁做媽媽好自私,淨係顧自己既感受;我就覺得作為媽媽,幾時bb晌身邊都係最"驚"貴的...每日陪住我成長..健康快樂就夠....

我唔知點好,不過我只係知道,其實我只有一條路,就係順從佢既做法...

但問心,我十萬個唔想......


大宅

國民生產總值:3114

畀面勳章


發表於 11-4-10 15:12 |顯示全部帖子
ILUVPUG, 不如聽下我個CASE呀,
我有加藉,但回流左返黎HK, 我老公係HK人冇加藉的,
上兩個月BB響HK出左世,
有左果時,得我一個自己諗要返去加拿大生, 冇人SUPPORT我,
果時我自己睇到加拿大條例改左, 以為唔返加拿大生BB就冇得自動入藉,
我日喊夜喊, 喊到豬頭咁, 都係想BB第2時可以讀書好D, 唔會好似HK咁辛苦,日嘈夜嘈, 仲嘈到連6299都忍唔住有D微言~

到最後, 我決定留響HK生係因為我老公話, 到時既野,到時先算, 就算你點安排好條路比BB, 佢都唔中意, 仲怪你既話, 你會點呢?你成日話咁樣咁樣係最好既比佢, 係唔係又真係呢? HK真係咁差? 加拿大又真係咁好?

不如你同你老公講, 點安排係你地比小朋友既,小朋友唔會知道出面有幾好, 最好既野係父母既愛...OK,就算係你真係過左去生, 佢唔響你身邊支持你, 做媽媽既未必頂得順, 做爸爸既, 錯過左每一個MOMENT就係冇得返轉頭, 每一個月你大肚都唔一樣, 就算有十個人一齊TAKE CARE你都唔等於一個老公響身邊咁重要... 同埋你地又知加拿大真係對BB好? 你地又點知加拿大岩你地小朋友發展? 好多野都係一個未知數, 點算要將一個未知既野黎嘈交呢?


珊瑚宮

國民生產總值:104655

2019勳章 開心吸收勳章


發表於 11-4-12 09:57 |顯示全部帖子
小朋友響香港讀書一定有壓力, 有幾大壓力都係睇父母點做, 但佢去外國讀書亦唔代表冇壓力, 同埋佢見唔到至親又唔代表冇壓力喎! 你老公夾硬要推小朋友去外國讀書, 難道小朋友唔會嬲佢咩?? 基本上你老公唔可以代表你個bb 去諗野! 佢硬淨唔代表你地個bb同佢一樣囉!!!

我都想番香港生細仔, 多個國籍自然有多條路 (相信10個海外媽媽, 有8個都想返香港生). 但之後我都覺得佢有本事既話自然有大陸公司請佢去大陸做野, 佢讀得成書咪自己去申請獎學金去讀書, 正如樓上既媽媽所講, 好多野都係未知數, 與其係咁, 不如就自己最方便有利最安心既地下生bb.


伯爵府

國民生產總值:17826


發表於 11-4-12 11:26 |顯示全部帖子
小朋友喺外國讀書係咪一定好呢? 我啲姑姐初中就送咗啲小朋友去英國讀boarding school, 覺得佢地英文好就ok. 但我有啲朋友係好細個就去英國, 佢地好多人嘅經驗係冇父母喺身邊好寂寞, 或有啲俾鬼仔蝦童年過得并不愉快.

我而家大肚唔舒服時真係好"孟"ga. 如果要我去一個唔熟悉嘅地方, 冇朋友親戚(你嗰個都只係老公家姐), 我諗我實有產前抑鬱都似. 你而家咁唔想去, 心情唔好對bb都唔好. 我好認同其他post, 你咁早幫bb安排未必對佢係最好. 我會覺得俾一個有父母愛錫同幸福快樂嘅童年比所謂幫佢鋪好條路(同埋你點知條路一定啱佢, 佢一定想跟?)更重要. 你再同老公商量一下啦.


伯爵府

國民生產總值:17826


發表於 11-4-12 11:38 |顯示全部帖子
我老公就讀完中五先過去讀high school + 大學, 佢話過俾我聽, 初初去頭一個月home sick嘅感覺一世難忘! 仲要係因為寂寞好學唔學走去學人食煙, 而家都戒唔到! 當然唔係個個都係咁, 只係唔好一面倒只諗去外國讀書有幾好而忽略咗其他嘢.


大宅

國民生產總值:4788


發表於 11-4-12 12:29 |顯示全部帖子
我就係本來想番香港生嘅海外媽媽之一, 原意係想將來小朋友多個選擇, 但老公話如果佢有本事, 自然有辦法去佢想去嘅地方, 佢冇心冇本事嘅, 多幾本護照, 多幾多重國籍都冇用。

實例:
(一) 我老公: 加藉,但比間美國公司睇中,結果出晒所有搬遷費, Visa錢請咗佢過嚟美國做嘢。
(二) 我細佬&細妹:都係美籍,讀大學近乎唔駛錢,但兩個都話大學“唔啱”佢地,讀咗兩、三個學期就drop out咗,屋企個個嘈到拆天都冇用,佢地過咗18歲,可以點?佢係唔讀嘅,吊起嚟打都冇用。
(三) 舊同學A:住公屋,父母望子成龍,死慳死抵供佢去英國讀書,結果佢去咗唔夠兩年,就話頂唔順番咗香港,唔好話畢業,連英文都學唔識,日日就群埋D香港,台灣,大陸同學四圍hea,嬉戲咗兩年,用咗屋企幾十萬,結果番香港响電器鋪做sales,搵埋都唔夠養自己。

依家最重要嘅係妳要心情開朗陀BB,讀書嘅嘢要靠佢自己㗎啦~~







© Baby-Kingdom.com Limited. All rights reserved.