第一集資料
http://www.baby-kingdom.com/forum.php?mod=viewthread&tid=5336031&extra=
其實我寫呢篇文係想鼓勵你地唔好放棄，並唔係鼓勵你地要搵返同我一樣的醫生，其實仲有其他中醫、婦產同不育醫生都好好，我已經PM左中醫資料俾好多人，亦介紹左自己好多朋友去睇，有朋友同我講佢睇左，佢最終要飲6劑藥，而且執左成$2K藥(1次)，我想話，其實個個人身體唔同，所以所需要的藥都唔同，而我調理身體已經係差唔多2年前的事了，以我所知中藥都貴左好多，如果大家已經收左我PM俾你的中醫資料而準備去睇的，都要有呢個心理準備，另外，我要宣佈由而家開始唔再PM中醫資料俾人啦，因為其實大家可以唔洗一定搵佢睇，如果有自己睇開的中醫都可以，如果一下子有咁多人一窩風去搵佢睇生仔，我驚佢都會嚇親，因為佢其實唔係主要睇呢樣野的，希望各位JM見諒！仲有我想話，曾經收過我PM的人，真係希望有一日可以聽到你地好消息呀！
我今次想係呢度再講一講有了BB之後的事。
其實唔單止係計劃生B時要調理好自己身體，我有了BB之後無論係飲食、日常生活我都加倍小心，有D人覺得唔洗咁緊張，唔會介口、用其他野都唔洗特別小心，係真的，有D人真係陀得好穩，無論做咩食咩什至唔小心跌親都會無事，但係我想話，你又知唔知你自己身體可以承受到幾多風險呢？當然唔係咩都唔好食，唔係咩都唔做啦，同埋，整個孕期其實都係差唔多9個月，喺呢段時間要自己介口其實都唔係好過份者，食咩都唔緊要，但要食D有營養嘅野，俾到營養BB就得啦，但係，提提大家有左BB唔好去進補，唔係補得滯好易有反效果。
好多人都會食花膠，想BB第日皮膚靚D，不過我記得中醫講過，花膠係有咁的效用，但如果媽媽想第日會餵人奶就唔好食啦，因為會收奶咁話，所以，我知道之後都無再整啦，佢建議我食海參，因為海參都有花膠的營養之餘，亦有其他例如OMEGA 3的營養，仲有，燕窩我都無食過，因為我知道有好多激素。有咩唔食得呢？其實要講的真係好多，睇下個人體質受唔受得，但係我好提一提大家真係唔好食黑木耳、山楂、木瓜，因為佢地都有滑胎的作用。
除了飲食之外，用嘅野其實都盡量係天然野，但係我唔建議大家用有香薰成份的東西，其實唔係所有香薰都唔用得，但係以我所知有好多香薰都係孕婦忌用，而如果唔知用開的話，就盡量避免啦！因為香薰有醫療作用，亦會影響人情緒&荷爾蒙。另外，我覺得孕婦瑜珈係好有用，因為佢可以令我整個孕期都無抽根，而且無咩腰酸背痛，一個星期一堂，試過無去一堂就腰痛了，做完又無事，不過亦有人唔受得，話D姿勢會令到個胎好底，而我建議大家最少要過左3個月先去玩，一開始玩的時候唔好強迫自己做D覺得吃力的動作，慢慢適應左就無問題。
其實我個BB好準時，係喺預產期果日出世，無早無遲，出世時有6磅幾，但SIZE係屬於細B，不過我地覺得SIZE唔係最緊要，BB健康就得，因為SIZE好多時都係遺傳，並唔係等於佢唔夠營養食唔飽。
BB出世之後，最大的問題就係細膽，成日好似好無安全感咁，初初聽長輩講話唔好抱慣佢，所以我地唔係佢一開口喊就會抱佢，但有一次試過喊左幾聲之後無人理佢，佢越喊越勁，喊到抽住抽住扯晒虾之後，我就唔敢唔理佢，果一刻個心係唸，我咁辛苦生佢出來，一定要好好保護佢，之後係KINGDOM問人應該點樣做，我好記得有一個JM講，”BB得幾日人仔，又未滿月，又點會疼壞，要俾多D安全感佢，等佢感受你。”我覺得好岩啊！得果幾日人仔，何必要由佢喊呢！？
另外有個最大的問題就係皮膚啦，BB遺傳了自己，都是非常的敏感，而且嬰兒的皮膚比較幼嫩，所以我覺得佢應該比我仲敏感，BB試過好多嬰兒沐浴的產品都唔得，都係會長紅點，之後我聽中醫講用金銀花煲水幫佢洗，雖然係好煩要每日都要煲幾煲同佢沖涼，但係真係好有效，BB的皮膚沖完之後無再有紅點同敏感，到我放完產假之後，無幾耐我搵到一隻澳洲的沐浴露，其實係去BB展果時送俾我的SAMPLE，同BB用左之後無咩不良反應，我就一路同BB用呢隻野沖，其實有時佢都會有尿疹，PAT PAT紅的情況，不過呢隻佢唔長其實紅點已經係最好，暫時仲未搵到一隻更好的了，而之後我在想，如果我能夠自己整一D天然的東西俾佢用，會唔會更好呢！？佢會更加得到呵護。
於是我自己做手工皂，因為手工皂可以自己選擇用咩植物油同添加物，而且全都是天然，我為她做了一隻屬於她的專用皂，並起了名字叫BB皂，哈！其實而家連我自己都係用緊呢隻皂，因為用左之後皮膚真係無再痕，濕疹無再發，所以我將會做多D存貨係度，自己用又好，賣俾人用亦好，大家都可以解決左敏感呢一個煩惱。(如果你地有興趣可PM我，我都有賣的，哈！坐月的時候我亦只用了一天薑皮水洗澡，之後都是用薑皂，比較方便呢！)
另外，BB的奶咀適唔適合佢原來都係好重要，我地原本為BB準備的是Pigxx的奶樽(矽膠奶咀)，但覺得佢食得有d吃力，之後想買乳膠俾佢試，但搵唔到PigXX有乳膠奶咀，於是買了Nux，BB之後食得快左好多，但佢有好多風，成日有庇庇，初頭以為佢本身腸胃問題，無咩點理，之後因為覺得NUX的奶咀太大，而佢又漸漸大力D，幫佢換返PigXX矽膠奶咀，佢就無左有氣的問題，亦無再成日放庇，我覺得係NUX D奶咀太大，唔岩佢，所以佢好多時會吸左D風落肚，就會咁，所以大家都要記住留意。
最後想提一提嘅係，食薑醋的問題，我第1次食係十二朝果日，果時D惡露係開始清緊，越來越少的狀態，但食完薑醋之後又開始多返，之後我唔敢再食，所以大家記住都要無晒清晒先好食，因為可能薑醋都係好補而且行血的東西，而惡露未清晒的時候係唔可以食任何補品的。
真係太多野未能盡錄，有咩問題大家PM我啦！
發表於 
返回列表
