funann 寫道:
星期六我地上左"塘廈三正半山酒店"玩, 我地係高速公路途中, 遇到出名o既"截車黨"; 當時我地一行十幾人由皇崗出發, 分坐兩架出租七人車, 因為人多, 我同肥豬倩要同爸爸分開車坐, 而我同阿女坐果架車, 車上面全都是老弱婦孺。
上到高速都好耐o下, 突然架車後轆好似"浪"到野, 跟住就有架無車牌的車追上黎, 對方車上有兩個男人, 示意我地駛埋一邊停車, 當我地成車人仲發緊吽斗, 連司機都猶豫地放慢車速... 好彩有個aunt好勁, 反應好快咁叫住司機千祈唔好停車, 仲要即刻加速, 要快過佢地... 跟住架賊車又好快咁追上黎, 想爬頭閘停我地(好有電影feel), 呢個時候, o係路邊再有另一架可疑車輛泊係一邊, 車上面有兩個男人, 架車又係無車牌, 一齊追住我地... 開始feel到唔妥, 又有d驚 , 唯有攬實d個女... 好在我地好快轉入收費站, 再望轉頭, 佢地已經無跟黎, 這時, 可疑度已經乘大100倍, 幾乎肯定果兩架係賊車...
希望大家上陸要小心, 一定要做好心理準備, 千祈唔好似我地成舊飯咁, 如果真係停車, 後果真係不堪設想!!!