今次同兩個家姐C6阿囡一共五個人去台灣玩咗九日，行程俾大家參考一下：
ＤＡＹ１機場＞台北＞台北全家歡旅店＞西門町四季發爺燒肉
今次去台灣坐EVA AIR BR868，時間1340 抵逹1525，六月十六星期日出發，機票連稅4大一小合共HKD$8584，由於我比較遲訂機票，會貴少少，不過都無所謂啦！
去到機場，長榮班機會有悠遊咭送，入面係無錢架，仲有個美食護照，介紹咩鋪頭有折，不過我無用到！長榮飛機餐一般，反而阿囡個兒童餐唔錯！到咗台北機場，好多人等過關，上年來過關只要五分鐘，今年多咗好多大陸團，過關時間要半個鐘！到我同阿囡過關，就有小小問題，原來阿囡個PASSPORT NO多咗個字，要搞小小手續先得！佢哋話今次可以蓋章就唔使錢，下次再係咁就要俾TWD300搞落地簽証，講真我都唔想搞成咁，如果佢哋要求一千都要俾啦！
出咗閘攞埋行李，我同C6一齊申請FREE WIFI，在第二航廈一出來就有台灣觀光處的COUNTER，用PASSPORT登記就得，五分鐘就完成！可以在台灣有FREE WIFI的地方用，好方便！跟住行去左手邊遠傳買電話咭，無用大哥大係因為人多，唔想等，遠傳買咗十日通話，TWD600送350，都幾抵！搞掂呢啲就去ATM攞錢，好奇怪我張咭攞唔到錢，C6張就無問題！:;pppp:之後我張咭在7仔又攞到，都唔明點解？我哋行去右手邊搭國光去台北車站，大人125，小童半價！好快就有車，到咗台北車站我第一時間落車去台鐡攞第二日去花蓮的火車票，由於台鐡網上訂票的程序比較難搞，到我訂飛時最快的太鲁閣號同自強號都無曬位，只好訂莒光號，仲要一早起身去搭，火車票344一位,小童又係半價,早上0710出發！
搞掂曬就行去今晚的酒店，我行咗落地下街，其實在地面行過去仲方便，唔使拖住行李又上又落！由於第二日要早起，我揀咗台北車站附近的酒店，又係太遲訂，好多都無曬房，求其租咗懷寧街的全家歡旅店來住，TWD2100四人房，本來我對佢無乜期望，因為價錢平，點知去到都覺得OK喎，房間都幾大，又有窗，有電梯，而且幾乾浄！
擺低行李就即刻出門口去西門町的四季發爺食燒肉，上次朋友帶我哋去懷寧街尾的分店食，覺得好正，C6話想再食，點知間分店執咗，只好去西門町分店食！點知今次真係有啲失望，招呼唔好都算，嘢食又唔齊，我哋好中意食一夜乾的魚仔，上次食到唔停口，今次嗌極都係得一兩條俾我哋，價錢仲要係TWD499一位，真係無下次！
食完係西門町行咗一陣，去檸檬屋買咗杯白玉苦瓜汁飲，好好味，阿囡飲咗一半有多，之後就返酒店瞓覺，因為明天要早起！
呢個司機我係網上搵，本來我哋四個人搵咗另一個姓張的司機，有人介紹話佢幾好，後來因為多咗個人，張司機架車坐唔落，佢就介紹咗呢個司機俾我，話佢架WISH新車，可以坐得曬！一上車林司機就問我係未第一次來台灣，同我講一日包車係八個鐘，由十點開始計，但係我哋當時搵到佢都成十點半！佢跟住不斷試探我對台灣有無認識，我已經覺得有古怪，不過以為佢熱情想知多啲嘢，所以都有答佢！我同佢講想出海睇鯨魚，跟住佢話幫我訂，報價大人800，小朋友要600，我問佢小朋友唔係半價咩？佢話無，之後話由於我哋係外國旅客，要搞好多手續，叫我提供資料俾佢確認咗先，跟住我話反正聽日都要過去，聽日先啦！
第一站佢帶我哋去和南寺，乜都無介紹，我哋入去睇咗一陣就走，知南寺係一間由師太打理的寺院，好新好舒服，里面供奉如來佛祖！
食飽我就問林司機係未放低行李先出發？佢就話民宿好遠，返來先，但其實民宿離我哋食飯地方只有十分鐘車程！結果一路上坐得好迫咁去三仙台，林司機路上一直唔出聲，無同我哋介紹風土人情，結果個個就去搵周公，好鬼悶！去到三仙台，佢居然唔識路，問咗幾次先搵到停車場！一落車就同我哋講俾半個鐘玩，點知我哋睇咗介紹要兩個鐘先玩曬！我哋上到條橋第四個拱門就要趕返來，因為怕佢等！之後回程，經過北回歸線標誌，太多大陸團，我哋無落車。去到八仙洞，上去睇咗個天然石洞的寺廟，叫靈巖寺，師太仲送咗條佛珠俾阿囡！跟住去石梯砰，林司機求其搵個位放低我哋，又無講邊個位置比較好，結果我哋行錯路，加上又開始落雨，所以都影唔到靚相！
我返到民宿同民宿主人講今日的經歷，佢就話個司機完全唔合格，仲有出海睇鯨魚個價貴咗！我問佢有無包車介紹，因為今日呢個超唔掂，我要求唔高都頂佢唔住！跟住民宿主人介紹咗一位曾大哥俾我哋，價錢係3500台幣一日，資深好多！民宿主人仲幫我哋訂埋出海睇鯨魚，每位700台幣，阿囡500台幣。落實咗聽日包車，我就用咗啲藉口打電話同林司機講聽日唔用佢，費事有手尾跟！搞掂曬跟住出去食飯，民宿主人推介盬寮龍蝦餐廳，行咗成四十分鐘先到，味道唔夠中午好食，價錢仲貴少少！
七點三執好行李，C6就話呢頭好易搭的士喎，一早就有車！我落去問下，原來司機就係昨日民宿主人替我約的曾大哥，佢本來打算幫我哋運咗行李去今日的民宿先，見到我哋可以出發就即時車咗我哋去買早餐，仲提醒我哋唔好食太飽，因為上船後怕大浪會嘔！我哋買咗啲蛋餅就去鯨世界報到，之後有專車送去碼頭。到咗碼頭我怕阿囡會暈船浪，買咗口服暈浪劑飲。八點開船，好多人爭住上樓上坐，C6就叫我哋坐樓下後排位置，話無咁易嘔！出到外海，開始見到有海豚，阿囡睇到好興奮，因為係幾十條跟住我哋隻船，仲要飛出水面轉圈！成船人都好開心咁追住來影相，呢個經歷真係好難得！聽船員介紹，六至八月都係睇鯨魚的季節，不過要睇到就視乎運氣！海豚多數都會見到，而且佢哋唔怕人，可以近距離接觸！
去到太鲁閣，大約十一點，曾大哥就叫我哋去行砂卡礑步道，仲提我哋要睇時間，因為太鲁閣有段路要維修，所以會限制車輛通行，十二點係放行時間，錯過咗又要等一點先可以入去！砂卡礑步道環境幾好，一路上有樹蔭唔怕曬，連阿囡都唔覺行得辛苦！去到五間屋，我哋就回程，因為怕過咗鐘上唔到山！去到停車場，曾大哥就同我講，話見到張司機，即係介紹昨日林司機俾我嗰個人，仲鬧咗佢一餐，話佢介紹個咁嘅司機俾我，影響旅客對花蓮的印象！張司機叫佢同我致歉，我話無乜嘢，反正出來玩就唔想因為啲無謂嘢影響到心情。
阿囡見到民宿地下間房係榻榻米，就話下次來一定要住呢間房！離開民宿，曾大哥先送我哋去火車站買聽日去宜蘭的火車票，再將行李送到今晚的藍天民宿。出發到第一站松山別所，呢個地方以前係日本人管治花蓮時的總部，環境清幽，仲見到好多蟬同獨角仙係樹上面！第二站是慶修院，是日式神社，我仲買咗塊木牌許願，台幣60咋！第三站是蓮花園，有免費蓮花茶飲，好清香！仲有好多錦鯉，阿囡餵魚餵到不亦樂乎！我問曾大哥蓮花園唔收入場費，點維持？佢答每日都有人來買蓮花，加上主人將蓮花制成花茶出售，所以無問題。有見及此，我同家姐都買咗包花茶台幣200以示支持！離開蓮花園，曾大哥帶我哋去白鮑溪玩水，好多當地人會在此野餐，阿囡見到有水玩就開心到不得了！之後去鯉魚潭，飲新鮮的木瓜牛奶，台幣50一杯，連我一向唔多中意飲奶都覺得好好味！鯉魚潭面積好大，可以踩單車或水上單車，不過我哋懶，見到有電動船坐，台幣100一位，就上船轉咗一圈，船夫除咗同我哋講解外，仲好安全咁飛咗半圈，阿囡平時好細膽，都話好好玩喎！食飽就去林田山參觀，呢度以前係個林場，因為人口減少而衰落，政府近年活化就多咗遊客來，不過好多蚊，我即時買咗枝樟腦精油，台幣200俾阿囡搽，先唔怕俾蚊咬！林田山仲保留以前的火車軌，影相好靚！
早上坐自強號約0810開出，大約一個鐘就到羅東，打俾包車司機JACKY，又係網上搵返來，六人車WISH，台幣3000一日，之前用E-MAIL溝通過，覺得都OK!一上車JACKY就送我哋去國立傳統藝術中心，門票台幣150位，我去咗買豬肉紙，台幣1000有6包，阿姐仲送咗條士多啤梨蛋卷俾我哋食，蛋卷好鬆軟，阿囡一個人食咗三分二！園內有歌仔戲睇，仲有巡遊。跟住我哋去今晚的民宿攞低行李先，間民宿在稻田中央，仲有溫泉浸，四人房台幣2800，超抵！搞掂就去醫肚，JACKY介紹我哋食甕仔雞，仲叫我哋點多兩個菜就夠，點知我見到樣樣都好吸引，叫咗八個餸先停手! 甕仔雞幾正，同在清境食差唔多！另外叫咗啲野菜，全部清枱！埋單台幣1700，抵食！下一站是菓風小鋪，阿囡買咗好多糖果做手信添！接住去宜農牧場，入場費台幣20，不過好多蚊同烏蠅，我買咗支奶餵豬，但係啲豬好似餓咗好耐咁，搶住食，搞到我都有啲驚！阿囡又怕咗大隻啲豬成日追住佢，唯有急急腳走！由於宜蘭水果好出名，我哋就買咗蓮霧、西瓜、荔枝、芭樂同芒果返民宿食，蓮霧同西瓜行到一半已經KO曬，真係好誇張！
行行下，我哋迷咗路，唔識返民宿，唯有打電話同女主人求救，女主人即刻開車出來接我哋，仲話我哋應該一早打俾佢就唔使行餐死。返到民宿，女主人仲問我哋聽朝想食咩早餐？我同C6講有溫泉浸，佢仲同我拗：間民宿咁平？邊係溫泉來架！我同佢講浸完溫泉，皮膚會好滑架，佢浸完先話：係喎！:;pppp:落到樓下，女主人已經準備好九樣早餐等我哋，實在太豐富啦！我哋食到好飽，等司機來接！九點鐘JACKY來到，將行李搬上車，同女主人道別，多謝佢有心思的早餐，期望下次再入住！
去到蘇澳，我哋就去泡湯屋，40分鐘台幣540，唔貴！蘇澳係世界上少有的冷泉，全世界好似得意大利同法國有，泡完冷泉可以令皮膚白滑同埋體溫保持清涼。初初泡，覺得有啲涷，因為得22度，過咗一陣就開始暖，阿囡仲係度潑水添！ 之後去鶯歌老街，開始落大雨，我哋走咗入一間鋪度DIY做花樽，阿囡做得好認真，台幣100咋，佢哋可以燒埋制成品，可惜時間要21日，運費要台幣550，我怕寄返來都會爛，唯有放棄！呢間嘢主打任食海鮮火煱，台幣539一位另加一，阿囡本來係小童價，佢哋話收台幣50就得，好好彩！間嘢食品種類幾多，海鮮有魚、蝦、蟹，仲有安格斯牛肉同黑毛豬，菜有好多我係未見過架，仲有甜品同三隻雪糕包括H牌同 M牌，仲有其他雪條同自制棉花糖，C6同家姐都食得好滿足！之後去咗慈湖，呢個係蔣介石靈寢安放的地方，十二點剛好有換兵儀式，我哋睇埋先再入去參觀，呢個地方好寧靜，環境又舒服，難怪老蔣將佢定為自己安身之地！仲有其他海鮮，包括蝦、蛤蜊、風螺、蟹腳等等，再攞去樓上加工，另外再叫咗的菜包括鮮笋沙拉、蚵仔煎蛋等等，陳先生仲買咗香魚請我哋食，買海鮮連加工運埋單台幣4040，超值！
發表於 
返回列表
